Goal mawi pali hmangin Arsenal an chak
Arsenal chuan Inrinni zan khan Liverpool goal-ah mawi tak takin vawi li an pet lut a, 4-1 in an mikhual Liverpool an hneh.
Arsenal tan Hector Bellerin, Mesut Ozil leh Alexis Sanchez ten goal an khung a. Liverpool goal neihchhun hi penalty aṭanga Jordan Henderson thun a ni. He inkhelah hian central midfielder Emre Can chu Liverpool a zawm hnua a vawikhat nan second half-ah hnawhchhuah a ni
Champion nomawi inchuha inkhel ni lo mah se kum thara Champions League khelh tum ve ve an nih avangin inkhel boruak a sang hle. An inhlau lo tawn a, an danglamna siamtu chu Liverpool tlar hnung phui lo leh Arsenal tlar hma ho chetṭhat ni a innang kha a ni.
Goal khung thiam Arsenal
Inkhel an ṭan chauh a Gunners lamin goal an khung teuh nghal hle. Midfielder Aaron Ramsey shot chu Simon Mignolet-a'n a lo dang hlauh. Liverpool an duai bik lo Raheem Sterling leh Lazar Markovic ten Arsenal tlarhnung an chaihbuai zui nghal a, Sterling-a'n goal thun theihna hun ṭha a bawlhpelh hlauh. Arsenal an vannei hle.
Minute 36-naah Aaron Ramsey ball pek chu defender Bellerin chuan box chhungah lalutin chep tak karah a ke veilam hmangin a pet goal.
Goal hmasa ber luh aṭanga minute thum a liam chauh tihah Arsenal lamin free kick an hmu, Ozil chuan Liverpool goal veilam sirah chiang takin a thlawh lut.
Arsenal in an la duhtawk mai lo Sanchez chuan Ramsey hnen aṭanga a ball hmuh chu fing tak a dawngin box pawn aṭangin kawh takin a pet lut bawk. Liverpool in minute 76-a an penalty hmuh chu captain Jordan Henderson-a'n goal-ah a chantir a, hun tawp hma chiahin Giroud chuan Arsenal goal li na leh he inkhel a goal hnuhnung ber a thun a, hun a tawp zui nghal.
Eng nge an sawi?
Liverpool manager Brendan Rodgers chuan, "Kan khel chhia a ni hran lo, kan tisual palh mai a ni. Tunah chuan kum thara Champions League khelh hi thil huphuhawm tak a ni tawh a, mahse kan la beidawng mai tur a ni lo," a ti.
Arsenal manager Arsene Wenger chuan, "Zanin khan kan khelṭha takzet a, ka lawm hle. Champion kan duh a nih chuan zanin ang khan season tawp thleng kan khelh a ngai ang. Mahse kan chak ringawt a tawk lo a, Chelsea chetsual kan chan a ngai tawh a ni," tiin a sawi.