Bundesliga-ah Lewandowski-a'n goal 250 a khung tling

Bayern Munich striker Robert Lewandowksi-a'n Bundesliga-ah goal 250 a khung tling ta. Polish striker Lewy hian Nilaini zan khan Wolfsburg lakah goal hnih a khung a, 2-1 in hnehna an chang.

Kum 32 mi Lewandowski hian kum 2010 khan Lech Poznan aṭangin Borussia Dortmund a zawm a, BVB tan hian Bundesliga-ah season li chhungin goal 74 a khung. Kum 2014 khan Lewy hian Bavarians a zawm a, season sarih hmang mekin goal 177 a khungsak tawh - a goal khung belh khawm hi goal 251 a ni.

Lewy hi German rama football inelna sang bera goal 250 khung thei pathumna a ni a, Gerd Muller (365) leh Klaus Fischer (268) te hnung a zui. Polish striker hian Bayern an chhuahsan loh chuan Fischer a record hi harsatna nei loin a khum dawn niin a lang a, Gerd Muller record khum erawh a awl ai lo ang.

Nizan khan FIFA chuan 'The Best Awards' semna hun an hmang a, Lewy hi Cristiano Ronaldo leh Lionel Messi te nen Best FIFA Men’s Player nominee-ah an awm. German football legend Lothar Matthaus chuan, "Lewandowski hian chawimawina hi a dawng lo a nih chuan FIFA hi ka ring leh tawh lo ang," tiin Bavarians striker hi a dah san thu a sawi.

Bayern Munich-in season liam ta khan nomawi lian pathum an chawi a, tun season-ah squad an siksawi avangin an la che ṭha tawk lo a, Bundesliga an la thunun thei lo. Amaherawhchu Bayern hian team ṭha bik an ni tih a pholang a, tun season league-a chak loh hmel la hmu lo Wolfsburg an hneh.

Wolsburg hian minute ngana lekah Maximilian Philipp hmangin hma hruai mah se Allianz Arena-ah Lewy telna Bavarians chelh reng a harsa. First half injury time-ah Kingsley Coman-a cross chu Polish striker hian a tauh lut a, second half minute 50-naah chakna goal a khung zui bawk.

Tun season inelna hrang hrangah Lewandowski hian goal 18 a khung awh a, 2019-20 season ṭantirh aṭang khan competitive club match 64 aṭangin goal 73 a khung. Bayern hian point thum hlu tak an hlawhchhuah avangin pakhatna Bayer Leverkusen chu point khat chiahin an pha tawh lo.