Chelsea-in German star ‘tur' Havertz la lut

'The next Michael Ballack' tiha an chhal Kai Havertz-a'n Ballack a khelh tawhna Chelsea a zawm. London club hian Havertz lakluh nan hian pound maktaduai 71 vel an seng a, Blues player manto ber dawttu a ni.

Chelsea player manto ber chu Kepa Arrizabalaga a ni a, kum 2018 khan maktaduai 71.6-in Athletic Bilbao aṭangin an lalut. Havertz chuan, "Ka lawm a, ka hlim hle. Ka naupan lai aṭanga ka suangtuahna Chelsea anga club lian tana khelh chu a thleng dik," tiin English club a zawm chu lawmawm a tih thu a sawi. 

Blues director Marina Granovskaia chuan, "Kai hi a kum rualpuiah chuan football thiam ber zinga mi a ni a, a hma lam hun kan club kuta a innghat hi kan lawm. Theihna sang tak a nei a, season ṭan hmaa kan zinga a tel hman hi kan tan chanchin ṭha a ni," tiin a sawi.

German attacking midfielder Havertz hi Aachen hmar lama khaw pakhat Mariadorf-ah June 11, 1999 khan a piang a, a pu vangin football lamah a kal a, an chhungkua hi football tui chhungkua an ni.

Havertz-a pu Richard hi Alemannia Mariadorf-ah club chairman a ni a, kum li mi a nih aṭangin Alemannia Mariadorf youth team hi a zawm der tawh. Kum 10 a nihin Bayer Leverkusen scout-in an hmu fuh a, kum 2010 khan Havertz hian German club hi a zawm.

Havertz-a pa hi police a ni a, a nu hi lawyer niin chhungkaw khawsa thei ve tak aṭanga sei lian a ni. Leverkusen academy-a an hotu hlui Jurgen Gelsdorf chuan, "Kai-a nu leh pa te hi mi inngaitlawm tak an ni a, hetiang chhungkua aṭanga a seilian hi a vannei hle," tiin a sawi.

Zirna lamah pawh Havertz hi a entawn tlak hle. 2017/18 season khan zirna avangin Atlético Madrid nen Champions League last 16 an khelh dawn ṭumin a tel lo a, chutihrualin a classmate-te'n Italy an tlawh ṭumin Wembley Stadium-a entu 85,000 hmaah Tottenham nen UCL-a match hmasa ber a khel thung.

Training a hautak ṭhin avangin zirna tawp san duh chang nei mah se manager Roger Schmidt-a fuihna zarah October 2018 khan A level nichungin a graduate. Chelsea player thar hi footballer ṭha tak a ni satliah lo a, lehkha thiam a ni.

The next Michael Ballack tiin Havertz an sawi a, Mesut Ozil leh Toni Kroos te nen pawh an khaikhin. Kum 21 mi Havertz hian a ke pahnih a hmang thiam a, midfield position hrang hrangah a khel thei a, 'Alleskonner' tiin a theihna hi an sawi hial. Chumi awmzia chu engpawh ti thei player tihna a ni.

Havertz hi Bundesliga-a Bayer Leverkusen tana khel thei naupang ber a ni a, kum 17 leh ni 126 mi chauh a nihin October 2016 khan a inlan. April 2018-ah kum 18 leh ni 307 mi a nihin league match 50 a khel tling a, record a siam. German midfielder hian Bundesliga match 118 aṭangin goal 36 a khung tawh a, ram tan match sarih khelin goal khat a khung tawh.

Germany tan U16, U17 leh U19 ah te a khel a, U21 erawh senior team-ah Joachim Low-a'n a koh tak avangin a khel ta lo. September 9, 2018 khan Germany tan a khel ṭan a, Chelsea-a a khelh ṭhat chuan Euro 20-ah pawh Low-a player pawimawh a ni thei ang.