Thla thum chawl tur Soyuncu

Leicester City defen-der Caglar Soyuncu chu a khel bawr hliam vangin thla thum tal a chawlh a ngai dawn a, tun hnaia result ṭha nei thei lo Foxes tan thu hriat nuam a ni lo. 

Kum 24 mi centre back hian a hliam vang hian Pathianni zana Aston Villa an ngam lohna inkhelah pawh a hmel a lan thei lo a, Turkey tana a fehchhuahna lama inhliam a nih avangin Leicester tan chuan an defender pawimawh inhliam hi a lawmawm lo lehzual ang. 

Soyuncu hian season hmasa khan Premier League match 38-ah match 34 ngawt a khel a, tun season-ah pawh Villa an hmachhawn hma league match li an khelhah chuan a inlan kim vek a ni. 

Leicester boss Bren-dan Rodgers chuan, "Thla thum tal a chawlh a ngai dawn a, Soyuncu tan chuan a hrehawm khawp ang," a ti a, a player an chhawr thei lo tur chu club tan channa a nih thu a sawi bawk. 

Foxes hian right back Ricardo Pereira chu March thla aṭang khan khup hliam vangin an chhawr thei lo tawh a, thla hmasa tawp lam khan midfielder Wilfred Ndidi chu khel bawr hliam vang bawkin kar 12 a chawlh tur thu an lo sawi tawh. 

Striker chhuanvawr Jamie Vardy chuan chawn hliam vangin Villa hmachhawn thei lo mah se hei erawh ngaihtuahawm loh niin an sawi a, Foxes fans tan thawk huaina tham a tling.