Magpies fan-ten ticket man aiah mi an pui

Newcastle United fan-te chuan Premier League a pay-per-view kalpuina man tam lutuk an duh lohna lantir nan pawisa an thawh khawm a, an pawisa thawh tling khawm £20,000 (nuai 19.06) chu Newcastle khawpuia West End Foodbank-ah an pe. 

Premier League match zawng zawng hi UK-ah television live a pekchhuah vek ṭhin a ni lem lo - hei vang hian thuneitute chuan October thlaa league match, TV lama live a an pekchhuah loh-te chu pay-per-view hmanga live a en theih turin an ti. 

Heng inkhel pekchhuah lohte hi fan-te chuan BT Sport Box Office emaw Sky Sports Box Office-ah £14.95 (Rs. 1424)-in an en thei a, Magpies fan-te chuan hei hi a to lutuk tiin an inkhel en man aiah midang puih nan ticket man hi an thawh khawm - mi harsate ei tur a thlawna pe ṭhintu pawlah sum tling khawm hi an pe zui. 

Inrinni zan khan Newcastle United hian 4-1 in Manchester United an ngam lo a, he inkhel hi UK a television hmanga live a pekchhuah loh zingah a tel a ni. 

Magpies chauh ni loin pay-per-view kaltlanga inkhel pekchhuah sak club Aston Villa, Burnley, Leeds United leh Manchester United fan-te pawhin Magpies fan-te hmalakna ang hian inkhel ticket man aiah midang ṭanpui nan an sum an thawh khawm. 

West Brom manager Slaven Bilic pawhin pay-per-view kaltlanga inkhel en man to lutuk hi na takin a sawisel a, Thawhṭanni zana Burnley nen 0-0 a an inhnehtawkna inkhel chu pay-per-view kaltlangin pekchhuah a ni. 

Croatian coach rorum chuan, "Football hi polo emaw golf emaw a ni lo. Football hi a thlawnin kan en tur a ni e, ka ti hauh lo a, mahse kan en ngam khawpa a tlawm a ngai thung a ni. 

"Football chu mi zawng zawng tan a ni a, football hi miretheite infiamna a ni a, mi zawng zawng en theih turin a awm tur a ni," tiin a sawi.