Barca-ah Messi a cham dawn

Lionel Messi chuan Barce-lona a chhuahsan ngei dawn nia a lan hnuah a thutlukna thlakin Barca-ah a cham dawn a, Catalan club tan season khat tal chu a la khel leh dawn tihna a ni.

Messi hian thla hmasa tawp lam khan Barca thuneitute hnenah chhuah dilna a thehlut a, a contract-ah hian season tawp apianga a thlawna chhuah theihna dan a awm avangin hman ṭangkai theih a beisei.

Mahse, Manchester City nen hnai taka sawi zawm hlawh hman forward hi Barca chuan a release clause euro maktaduai 700 baka a chhuah theih loh tur thu an sawi a, Messi hian amah siam liantu club nen court-a inkhin ai chuan cham chunzawm a thlang ta zawk a ni. 

Kum 33 mi forward chuan, "Ka ngaihdan chuan chhuak turin zalenna ka nei a, club President pawhin kan duh phawt chuan season tawp apiangin chhuah theihna dan ka neih thu a sawi fo a ni. 

"Mahse, chhuah ka dil ve leh June 10 hmaa ka sawi loh thuin min chhang a, June 10-ah chuan La Liga nomawi chawi beiseiin kan la khel a, hri leng vangin season pumpui a danglam bawk.

"President berin ka chhuah theihna dan chu euro maktaduai 700-a min lei duh an awm chauhin niin a sawi a, thil theih loh hulhual a ni. Chuvang chuan he hmuna cham tur hian thutlukna ka siam a ni. Barca hi ka hmangaih em avangin court-ah ka khing thei lo - he hmun ka thlen tirha engkim min petu kha a ni tlat a ni," a ti. 

Messi hian a tira chhuah a dilna chhan tak chu club thuneitute chunga a lungawi loh vang leh khelmuala beisei an phak loh vang a nih thu a sawi a, "Nomawi kan chawi kher lo a ni thei a, mahse tumna a awm ve a ngai a ni," a ti. 

Ballon d’Or chawimawina vawi ruk dawng thei khawpa player thiam bik Messi chuan, "Ka nupui fanaute hnena chhuah ka tum thu ka sawi kha thil hrehawm tak a ni. Kan chhungkuain kan ṭap a ni ber a, ka faten Barcelona chhuahsan an hreh takzet a ni. 

"Mahse, khelmual lam ka thlir a, a sang thei ang bera inelna hmachhawn ka duh. Nomawi chawi ka duh a, Champions League beisei thei team nih ka duh - he inelna hi a hautak em em a, tlawm chang pawh a awm tur a ni. Mahse, tum ve phawt a ngai. 

"Rome, Liverpool leh Lisbon khawpuiah te khan mualpho lo tal ila ka ti a, khang zawng zawng ngaihtuahna khan chhuah châkna ka thinlungah a tuh a ni," a ti.  

Messi hian season khat bak Barcelona-ah hian contract a nei tawh lo a, nakkum nipui transfer-ah chuan a duh lam panin a puanthuah a tel thei tawh dawn - Dutch coach Ronald Koeman tan chuan Messi chelh zel turin tun season result a pawimawh ang.