Ronaldo ropui zanah Real chak chiang
Pathianni zan La Liga-ah Cristiano Ronaldo-a'n a theihna a pholang a, Granada CF lamah goal nga khungin a team Real Madrid a chakpui chiang hle.
Santiago Bernabéu-a inkhelah hian Real Madrid in inkhel an thunun tluan chhuak zak a, Ronaldo chuan minute riat chhung leka hat-trick siamin 9-1 in an chak a ni.
Inkhel chu
Inkhel an ṭan a, Real player aiin Granada player an hlauhawm hmasa zawk. Mikhual team tan Ruben Rochina leh Ibanez te'n Real Madrid tlar hnung an rum ṭhaih a, Real fan-te thin a phu rang. Granada an inringtawk tawlh tawlh a, mahse goal an khung hmain an inkhel tibuai turin Gareth Bale a lo lang a, Toni Kroos ball pass ṭha tak chu Granada defence karah la lutin mawi takin a pet goal.
Real an hawi kir tawh lo, Bale goal hnuah hi chuan an khung mawlh mawlh a ni ber a, Ronaldo chuan minute 30 naah James Rodriguez-a ball siamsak chu goal-ah a lo chantir. Hetah hian Ronaldo-a'n a duhtawk mai lo. Marcelo ball cross Granada keeper Oier-a'n a lo khawih per chu Ronaldo ke bulah ber kher a tla a, Potugal captain hian minute 36 naah a goal hnihna a khung leh. Hattrick siam turin Ronaldo hian hun a duh rei lo, minute 38 naah hla tak aṭanga goal khung lehin first half-ah goal li in Real Madrid in hma an hruai.
Second half-an khel a, chak tur a chiang tawh. Real Madrid tan Karim Benzema chuan minute 52 naah goal a rawn khung a, minute 54-ah Ronaldo bawk a rawn lang leh a, Granada defender te'n dan ngaihna an hre lo a ni ber. Minute hnih a liam hman chauh a, Benzema chuan goal a rawn khung ve leh. Real in 7-0 in hma an hruai der.
Minute 74 naah Ibanez Castro chuan Granada tan goal khat a rawn khung ve khiah. Mahse, Mainz chuan minute 83 naah Granada CF mualphona belhchhah turin anmahni lamah a ti goal. Ronaldo bawk a rawn lang leh a, minute 89 naah match khata a goal nga na rawn khung ve lehin 9-1 in Real Madrid an chak.
Inkhel chhehvel
Ronaldo ropuina belhchhahin a awm zel a, Granada laka a goal nga thun hi match khata goal nga a khung hmasak ber a ni. Tun season-a a hat-trick vawi nga siamna a ni bawk. Ronaldo hian Lionel Messi record a nih rual ta chiah a, La Liga-ah player ropui pahnih hian hat-trick vawi 24 ve ve an siam tawh.
Ronaldo hian tun season La Liga-ah goal a khung hnem ber mek a, match 36 a khelh tawhah goal 36 khungin goal kua penalty aṭangin a khung. Ronaldo hnuai chiahah Lionel Messi awmin match 32-ah goal 32 a khung tawh a, a goal khung zinga goal thum hi penalty aṭanga a khung a ni bawk.
Real in Granada an hnehna hi September 1967 a 9-1 a Real Sociedad an sawp hnua an chak leh chian ber ṭum a ni. La Liga-a an chak chian ber erawh 1959/60 season khan niin 11-2 in Elche an sawp. Tun season-a La Liga team Granada tih loh Real in an hneh chian ber chu Deportivo La Coruna niin 8-2 in hnehna an chang.
Ballon d'Or kawl mektu Ronaldo hian Real tan goal 300 a khung tling ta a, Real Madrid tana goal 300 khung tling thei dang chu Real fapa rangkachak an tih ṭhin Raul leh Alfredo Di Stefano te an ni.
Raul hian Real Madrid tan match 741 khelin goal 323 a khung a, Alfredo Di Stefano hian match 396-ah goal 308 khungin goal 300 khung tling turin Ronaldo-a'n match a mamawh tlem ber. Vawi 287 Real kawr ha chunga a inlanah goal 300 a khung thei a ni.
Ancelotti thukhawchang
Real Madrid manager Carlo Ancelotti chuan, "Team in hma a sawn rual in Ronaldo chuan hma a sawn ve zel thei a ni. Madrid-a a rawn kal hnuah match khata goal nga a khungna hmasa ber a ni a, hei hi club leh ama tan pawh a ṭha a ni. Inkhel bul kan ṭan ṭhat avangin goal tam tak kan khung a, ka lawm takzet. Mahse, hei chu game khat chauh a ni a, kan game hmabak zela hetianga kan khelh hi a pawimawh ber chu a ni," a ti.