Barca in hma hruai chhunzawm zel

French defender Jeremy Mathieu hian Valencia aṭanga Barce­lona a zawm hnuah a game hmasa 16-ah goal thun lo mah se Real Madrid an hneh na goal a khung bakah Celta Vigo hneh na goal a khung leh ta.

Celta Vigo defender ten minute 72 chhung Lionel Messi a leh a hote an dangchat thei a, mahse minute 73-na a Xavi free-kick pet Mathieu tauh goal tur erawh an dang zo lo. Khualmualah Barca 1-0 in an chak a, La Liga-ah point 71 hmuin hmaan hruai chhunzawm zel, an hnuai chiah hian Real Madrid awmin point liin an inthlau mek a ni.

Chilean international Fabian Orellana chu minute 88-naah hnawh­chhuah a ni. Orellana hian Dani Alves laka a foul avangin free-kick a chawi a, hemi pet tur hian Busquets a rawn ding chhuak. Busquets-a'n pet mai loa a nghak chu ngaithei loin field-a grass chu pawtin Busquets vawm nan a hmang a ni.

Barcelona boss Luis Enrique chuan, "Season tawp a hnaih tawh avangin inkhelh zawng zawng a harsa in theih tawp chhuah vek a ngai tawh. Zaninah pawh khan Celta Vigo lam kha an khel ṭhain min dang chat rei em em a, mahse a tawpah kan thawhrim rah kan seng thei hram a ni," tiin a sawi.

Celta Vigo coach Eduardo Berizzo chuan, "Point kan hmu lo kha a pawi takzet, ka naute khan point hlawh phu khawpin an khel a ni. Red card kha chu pek awm reng a ni, Orellana chet dan kha a mawi lo a, thinrim lai chuan insum theihna neih hi a pawimawh hle a ni," tiin a sawi.