IPL 8 a hnai, player senior te boruak a lian

Cricket inelna ngaihhlut hlawh tak India Premier League chu a season riatna Ningani hian khelh ṭan a ni dawn a, boruak a lian leh tawh hle.

India senior player tam zawk, tunhnaia India squad a lang pha lo te chuan IPL hi India team-a hmun chan leh nan chhawr ṭangkai an tum hle. India tana khel ṭhin tunhnaia khel pha lo IPL khel tur langsar zingah Gautam Gambhir, Yuvraj Singh, Zaheer Khan, Irfan Pathan, Harbhajan Singh leh Virender Sehwag te an tel.

Gambhir hi Kolkata Knight Riders captain ni chungin IPL 8-ah a rawn inlan anga, vaibelchhe 16 hlawh tur Yuvraj Singh chuan Delhi Daredevils kawr a rawn ha bawk ang.

Chennai Super Kings tana khel tur Irfan Pathan chuan India squad-ah kir leh ngei a tum thu a lo sawi tawh a, Delhi lama Yuvraj te nena khel ho tur fast bowler Zaheer Khan pawn India squad-ah kir leh ngei a tum thu a sawi. Zaheer hi bowler zinga hlawh hnem tur pawl niin vaibelchhe li lai a hlawh dawn a ni.

India spin bowler senior Harbhajan Singh chu Mumbai Indians tan a khel anga, Sachin-a opening partner ṭhin Sehwag hian Kings XI Punjab tan a khel thung ang.