Defoe-a'n Sunderland a chakpui

Pathianni zan Premier League-ah North East derby hmuhnawm kan hmu a, derby-a a zawna an vawi nga chakna turin Sunderland chuan Jermain Defoe goal ropui hmangin Newcastle United chu 1-0 in an hneh.

Sunderland khelmual Stadium of Light-a inkhelah hian Jonas Gutierrez chuan cancer vanga rei tak a chawlh hnuin Newcastle tan bul a rawn ṭan a, August 2013 hnua inkhel bul a ṭan leh hmasak ber a ni.

Inkhel chu

Inkhel ṭan tir aṭangin Sunderland in game an thunun nghal a, chance erawh an insiam hleithei lo. Minute 21 naa an chance neih hmasak berah Connor Wickham ball tauh an lo dan per chuan goal post per mahse a per lehlam hi Moussa Sissoko chuan a lo pet out hman.

Newcastle in an nawr ngam lo a, counter attack- ah an innghat. Minute 45 naah Magpies in Sunderland goal an bawh ngam loh an tuar ta nge nge a, Jermain Defoe chuan yard 22 vela hla aṭangin kil takah mawi em em in Steven Fletcher ball tauh thlak chu a lo volley goal a, Newcastle keeper Tim Krul-a tan dan ngaihna a awm lo. Kum 32-a upa Defoe hi a goal khung vang hian a ṭap hial.

Second half-ah Newcastle-in inkhel rawn thunun deuh zawk mah se Sunderland tlarhnung an chhaih buai hleithei lo. Black Cats ho bawk an hlauhawm hmasa leh zawk a, Fletcher-a'n Jordi Gomez cross a pet over hnu lawkah Sebastian Larsson chuan free kick aṭangin a pet out hlauh bawk.

Newcastle an harh zawk a, Remy Cabella leh Ayoze Perez te'n hun tawp hnaih lamah Sunderland keeper Costel Pantilimon an 'test' a, a goal lo ve ve hlauh. Goal dang lut tawh lo in inkhel a tawp a, chak phu zawk Sunderland in 1-0 in hnehna an chang ta a ni. Sunderland tan match kaw hnua an chak vawikhat na a ni.

Eng nge an sawi?

Sunderland manager thar, a game hmasa bera West Ham an hneh loh hnua Newcastle hnehtu Dick Adovcaat a lawm a, "A tir aṭanga a tawp thleng khan kan khel ṭha takzet a, ka nau te ka chhuang hle a ni. Goal ropui tak kan khung bakah chance tam tak kan insiam thei a, chak kha kan phu a ni. Tunah chuan Crystal Palace lamah kan insawrbing leh tawh ang, " tiin an inkhelh hmabak a thlir lawk.

Newcastle United manager John Carver chuan, "First half kan khelh dan kha chu kan khel chhe takzet a a ni. Kan theihna zawng zawng kan pe lo chu ka ti lo a, mahse chutiang chuan kan khel lo. Jermain Defoe-a goal kha world calss goal a ni e," tiin goal khungtu Defoe a fak zui.