Kane captain na hnuaiah Spurs an chak zo lo

Tottenham Hotspurs in Pathianni zanah Liverpool kalpelh na hun remchang an hmu a, an hmang ṭangkai zo lo. Khualmualah relegation zone-a awm mek Burnley chu an hneh zo lo a, goal awm lo in an ṭin.

Turf Moor-a inkhelah hian Spurs captain leh keeper ni bawk Hugo Lloris chu hliam vangin a khel thei lo a, tunhnaia English striker che ṭha tak Harry Kane chuan captain armband a rawn hreng.

Inkhel chu:

Inkhel an ṭan a, rin kai Spurs aiin Burnley an hlauhawm hmasa zawk. Inkhel ṭan aṭanga minute li na lekah tunhnaia Liverpool nena sawi zawm Danny Ings chuan Burnley tan chance duhawm a nei a, mahse Lloris inhliam vanga khel Spurs keeper Michel Vorm-a zawnah tak a pet a, keeper tan man harsa a ni lo.

Minute 15 naah Spurs lamin chance an nei ve thung a, Belgium winger Nacer Chadli chuan ṭha taka petin Burnley keeper Tom Heaton chuan a lo dang ṭha hle.

Hemi hnu lawk hian Man­chester City an hneh ṭuma goal khungtu Boyd chuan Burnley tana a chance duhawm neih a chhawr ṭangkai thei tlat lo. Chawlhlawk hma lawkin Danny Ings chuan chance duhawm a rawn nei leh a, mahse Vorm chuan ṭha takin a lo nam over hlauh.

Second-half an khel a, Tottenham defender Kyle Walker chu hliam vanga lakchhuah niin Vlad Chiriches chuan a rawn thlak. Burnley keeper aiin Spurs keeper Vorm-a'n hna a ngah zawk a, a hna erawh a tlin viau. Ings leh Ashley Barnes' te goal shot ṭha tak chu ṭha tak bawkin a lo dang leh.

Hemi hnu lawk hian Spurs in Christian Eriksen hmangin chance duhawm an nei a, mahse Danish player ṭha hian a pet over hlauh. Burnley tan Boyd chuan injury time-ah chance ṭha tak rawn nei lehin a pet out hlauh a, goal khung lo in an ṭin ta a ni.

Eng nge an sawi?

Burnley manager Sean Dyche chuan, "Game danglam tak kan khelin ka hria. Point hlu tak hlawhchhuakin team ṭha tak lakah goal kan chhuah lo thei a ni. Kan lunghnur hran lo, chak tumin kan inkhel a, chak theihna chance ṭha tak tak kan insiam a ni. Inkhel kha kan thunun zawk niin kei chuan ka hria a, chak zawk nih kan phu a ni," tiin a nau te khelh danah a lawm tawk thu a sawi.

Tottenham manager Mauricio Pochettino chuan Champions League an la thlir thu sawilangin, "Competition lian thama khel tur chuan game tina chak chhoh hi a pawimawh a ni. Mahse, Burnley khan an khel ṭha em a, kan chak zo ta lo a ni. Tottenham ang team lian enkawl chuan chak reng turin mipui te'n min beisei ṭhin. Top four zinga lan phak hi a harsa dawn tih kan hria a, mahse a tawp thlengin kan bei ang," a ti.