Kolkata-ah Kaka kan hmu maithei

Indian Super League club Atletico de Kolkata co-owner Sourav Ganguly chuan Brazil player ropui Kaka chu an lakluh maitheih thu a sawi.

Kaka hi Major League Soccer club Orlando City tan khel mekin, nikum 2014 khan kum thum leh a chanve cham turin contract thar a sign ni a sawi a ni.

India cricket captain hlui Ganguly chuan, "Kaka chung­changah hian inbiakna kalpui mek a ni a, engmah tihchian erawh a la awm lo. Tihchian a nih hunah chuan kan puang zar em em ang," tiin Kaka an biak mek thu a sawi.

Kolkata khawchhuak, 'Prince of Kolkata' tih hminglem an phuahsak Ganguly chuan an coach chungchang sawi lang nghalin, "Antonio Lopez Habas hi ISL season hmasa ber a min champion puitu a ni a, kan tan chuan a hlu a ni, " a ti.