United-in City an rûmṭhaih - Van Gaal

Manchester United manager Louis Van Gaal chuan tun hnaia an result ṭhat avangin Manchester City an hlauhthawn thu a sawi.

Pathianni zan dar 8:30 khian Old Trafford-ah Manchester derby khelh a ni dawn a, Dutch manager hian inkhel tur thlir lawkin thu awmze nei a sawi niin a lang. Rilru lama inkhelh hi Van Gaal hmaa United enkawltu Sir Alex Ferguson pawh khan a ching hle.

Van Gaal chuan, "Tuna kan khelh dan hian kan player-te a ti phur a, kan khingpuite rilruah nghawng a nei bawk. Tunah chuan inrintawkna kan nei tawh a, point hloh an hlau tawh a ni. Player mimal an pawimawh a, City player-te hi ka hrechiang tawk lo. Kan khelmualah kan chak loh khât avangin City lakah hian hlauhthawnna kan nei lo," tiin a ṭawng pawr hle.

Manchester United hian Premier League matach hnuhnung pa­ngaah hnehna an chang vek a, an club hneh zingah Tottenham Hotspurs leh Liverpool te an tel.

Amaherawhchu, United hi Old Trafford-a City nena an inkhelh hnuhnung pathumah an chak lo vek a, goal 11 an chhuah. Manuel Pellegrini hote hian November thla khan Etihad Stadium-ah Sergio Aguero goal hmangin 1-0 in United hi an hneh bawk.

Dutch manager chuan, "Kan inhma­chhawn hmasak zawk ṭum kha chu United dang daih a ni. City kan hneh loh kha chu bul kan ṭan tirh kha a ni a, tunah chuan a tawp lam kan hnaih tawh a, team kan insiamrem tawh. Player-te an inrintawk tawh a, kan result aṭangin United dang kan ni tawh tih a lang bawk," a ti.