PSG in Ligue 1 hma an hruai leh ta

Paris Saint Germain in Pathian­ni zan khan Ligue-1 match an khel a, vawi hnih lai goal phur hmasa zawka an ṭan hnu in an si phurh an sut zo vek a, khualmualah 3-2 in Olympique Marseille an hneh.

Stade Vélodrome-a inkhelah hian Marseille tan Andre-Pierre Gignac chuan minute 30 naah goal hmahruai a khung a, minute 35 naah Blaise Matuidi chuan PSG tan a rawn sut nghal.

Mahse, PSG tlarhnung te'n French player Gignac bawk an ngam lo a, kum 29-a upa striker hian first half tawp hma chiah minute 43 naah Marseille hmahruaina goal a khung leh a, chawlhlawkah Marseille in 2-1 in hma an hruai.

Second half an khel a, PSG tan minute 49 naah Brazilian centre-back Marquinhos chuan an si phurh a rawn sut a, goal dinhmun chu 2-2 a ni. PSG fan-te au thawm a reh fel hma in Jeremy Morel chuan anmahni lamah ti goal palhin PSG goal khat a 'khilai' a, 3-2 in PSG chak zawkah an ṭang ta a ni.

PSG hian Champions League-ah Quarter-final an luh avangin trophy pali chawi thei dinhmunah an ding mek a ni.

Paris Saint-Germain coach Laurent Blanc chuan, "Kan chak hi kan lawm em em rualin kan player pawimawh David Luiz leh Thiago Motta te'n hliam an tawrh phah avang erawh chuan pawi ka ti hle. Mahse, Marseille-ah kan chak avangin kan lawm em em a ni," tiin an lawm rualin an player pawimawh pahnih inhliam chu pawi a tih thu a sawi.