I League Second Division SSB Ranidanga-ah a sang pali inkhel dawn

Siliguri-ah I League Second Division khelh a ni a, Kanchenchunga Stadium leh SSB Ranidanga-ah team pariat an inel. Vawiin hian ground chhe zawk SSB Ranidanga-ah vawi thum khelh zawha a sang pali te an inlan dawn.

Dar 9:30-ah Aizawl FC-in palinaa awm mek Hindustan FC an hma­chhawn dawn a, tlai dar 3:15-ah Chanmari FC-in rinkai zing ami Kashmir Lonestar an khelh pui bawk ang.

Lonestar Harhtharna

Kashmir club zing I League Second Division khel hmasa ber Lonestar Kashmir hi Aizawl FC-in an game hmasa bera 4-1 a an hneh vang ngawtin dah hniam a thiang lo. Lonestar hian Mohammedan SC leh PIFA te an hneh zui a, table-ah pathumnaah an awm der tawh. Chanmari FC hi an hneh a nih ngat chuan goal 15 lawih khung thei MPL2 champion nen hian an point hmuh zat a intluk dawn.

Lonestar-in Nigerian forward Christopher Chizoba leh Punjab forward Ajay Singh an nei a, Ajay hi Pailan Arrows, Churchill Brothers leh Mohammedan SC tan te pawha khelh tawh a ni.

Forward pahnih baka Kashmir club innghah­na tur chu Manipur player tawnhriat nei ṭha midfielder James Singh, forward Bisheshwor Singh leh keeper Lousigam Ashok Singh te an ni.

Chanmari FC-in inhliam vangin MPL season thuma best keeper ni vek thei Lalawmpuia bakah defender ṭha Lalruatthara te an chhawr thei dawn lo a, AwP-a aiah Lalruatpuia a lut ang a, Ruatthara thlak tur erawh a la chiang lo. Cameroon player Patrick Arol Enondji emaw Lunglei tlangval C. Lalrosanga emaw an lut ang.

Chanmari FC-in vawi thum khelh tawhah goal li an khung tling vek a, hei vang hian Lalbiakhlua (Goal 5), F. Lalrinpuia (3), Joel Sunday (3) leh Malsawmfela (2) te inkawp ven hi Kashmir tan hna hautak a ni ngei ang.

Chanmari FC coach H. Vanlalthlanga chuan, "Inkhelh hma chuan kan dinhmun tur hi sawi thiam a har ṭhin. Tun dinhmunah chuan kan inringtawk khawp mai, amah­erawhchu Lonestar pawh hi team ṭha tak chu an ni," a ti.

Hindustan Vs Aizawl FC

Nikum khan I League Second Division-ah Aizawl FC-in Hindustan 2-1 in an hneh lo a, khami ṭuma goal khungtu Nigerian forward O.O.Sola kha tun ṭumah pawh Delhi club tan player pawimawh a ni reng.

Inelna kalphungah squad-ah foreigner pathum neih theih a ni a, player pahnih playing XI-ah chhawr theih a ni. Hin­dustan erawh an vannei a, Nigerian forward James Effiong-a nu hi Indian a nih avangin Indian player anga chhiar tel a ni a, foreigner pathum playing XI-ah an hmang thei bik.

Hindustan hian Chan­mari lakah goal ruk an chhuah a, goal hnih an khung ve tih erawh theih­nghilh loh a ṭha. Aizawl FC tan point li hmu tawh Hindustan hi hneh chianga an ngai a nih chuan an tisual ang.

Aizawl FC-in Liberian forward Alfred Kemah Jaryan an chhawr thei tawh dawn a, yellow card vawi hnih hmu tawh Zoramthara a awl thung dawn. Point kua hmu tawh Aizawl FC an dam kim a, tun hi dinhmun sawhnghehna remchang a ni.

Aizawl FC coach K. Malsawmkima chuan, "Kan hneh mai chu ka ring. Kan team boruak a ṭha a, team zawng zawng an ṭha vek chunga a zawna vawi thum kan chak thei hi kan lawm hle a ni. Pathianin min awm pui, inhliam an awm lo a, kan theihna angin kan khel chhuak a, hei hi kan theihna bak a ni. Mizo mipuite ṭawngṭaipuina kan ngen tak meuh meuh a ni," tiin a sawi.