Everton an tho chhuak leh ta

Carlo Ancelotti enkawl Everton-in Nilaini zan khan King Power Stadium an luhchhuah a, Richarlison leh Mason Holgate te goal hmangin Leicester City 2-0 in an hneh.

Toffees hian ṭha taka season an ṭan hnuah beisei an pha lo a, Liverpool nen Merseyside Derby-a an inhnehtawk hnuah match li chhung a zawnin an chak lo. Hemi hnu hian Evereton hian Fulham  hneh mah se Leeds United an hneh lo zui a, Burnley lakah point khat chauh an hlawh chhuak.

Tunah erawh season ṭantirha kan hmuh Everton bawk kha an ni leh ta a, Chelsea an hneh hnuah Champions League khelh beisei ngam zinga mi Leicester City an hneh. 

Ancelotti hian Foxes an hmachhawn ṭum hian hliam vangin James Rodriguez a chhawr thei lo a, England number 1 keeper Jordan Pickford aiah Robin Olsen a thlang bawk.

Swedish keeper Olsen hian goal a chhuah loh avangin Pickford dinhmun a derthawng ṭan. Everton tana chanchin lawmawm lo erawh midfielder pawimawh Allan chu inhliam vangin minute 41-naah an thlak.

Leicester boss Bren-dan Rodgers chuan, "Goal kan chhuah ho hret a, chu chu kan chak lohna chhan ber a ni. Theihtawp chhuahin nawr mah ila kan thlarhmate an hriam tawk lo," tiin a sawi a, penalty hmu tura a inngaih thu a sawi lang bawk.

Toffees hian point 23 hmuin panganaah an inhlangkai a, palinaa awm Leicester hi point khat chiahin an pha lo.