MSL lam hawi ila Mission Veng Vikings Vs Tuikual South
Samsung 3:16 Plan Solution Mizoram Super League chawlh hun a zo a, zanin aṭangin khelh ṭan a ni leh dawn. Zan dar 8:00 hian Hawla Indoor Stadium-ah Mission Veng Vikings leh Tuikual South te an inkhel ang.
Ruahman lawk dan chuan Vikings leh Tuikual South inkhel tur hi March 24 a khelh tur kha a ni a, remchan zawkna avangin zanina khelh tur a ni a, Round 7 khelh zawhna tur chiah a ni.
Tuikual South-in an game hnuhnung berah hneh loh tawng lo Khatla TBL hneh theihna hun remchang an nei a, mah se huntawp lama an chetsual avangin team dang ang thoin TBL lakah an tlawm. Mission Veng Vikings pawh an chak zo bik lo, rinkai zawk ni chungin Zarkawt Serpents an hneh lo.
Mission Veng hian an player pawimawh Lalrina Renthlei an chhawr thei dawn lo a, coach Reuben Lalchhandama chuan, "Rina hi player pawimawh a ni a, a tel lo hian kan khel thei tur a ni. Player-te'n an tih tur ṭheuh an tih chuan Rina tel loh hi a hriat loh ang," a ti.
Chanmari tlangval Ch.D-a chuan sawi chhunzawmin, "Final thlen kan tum a nih chuan Tuikual South hi kan hneh ngei a ngai tawh a ni. Player ṭha tak tak an nei a, chutihrualin mimal ang chuan kan veng thiang lo ang. Basketball-ah chuan che ṭha bik an awm a, chumi hunah chuan kan defence dan kalhmang chu kan thlak ang. Taksa lamah chuan kan inpuahchah ṭha tawh a, rilru lamah kan inpeih a ṭul a ni," a ti.
Tuikual South hnuaiah Chaltlang Ryders chiah an awm tawh a, final luhna kawng a zim tawh. Coach KC Lalliantluanga chuan, "Zarkawt BCA hi final lut turin an dinhmun a ṭha tawh a, keini tan chuan beisei tur a tlem tawh. Hei vang hian pressure kan nei lo a, hahdam takin kan khel thei tawh ang. Season tawpa pangana nih reng kan duh lo a, dinhmun ṭha zawka awm turin ṭha takin kan inpuahchah a ni," tiin final luh a inbeisei tawh loh thu a sawi.
KC-a chuan sawi zelin, "Supporter kan nei ṭha a, kan innghahna an ni. Min ṭawiawmtute tana lawmna siam hi kan tum a ni," tiin chak an tum thu a sawi.
Tuikual South-in player pasang Rakesh an nei a, Vikings coach Ch.D-a chuan, "Rakesh hi player vantlang tak ni mah se a san ṭhat avangin a ṭhatna hi Tuikual South hian an hmang ṭha tawk lo," a ti. Zanina mipui mit fukna tur Rakesh hian F. Zodinthara leh Vanchuangpuia te puihnain Lalrina tel lohna Mission Veng Vikings hmaah a theihna lantir a tum dawn a ni.