Miami Open champion Novak Djokovic

Novak Djokovic chuan Andy Murray hnehin Miami Open nomawi a chawi a, he tournament-ah hian vawi nga a champion na chiah a ni. Tennis a khelh chhungin nomawi vawi 51 a chawina chiah a ni bawk.

Boruak lum leh hnawng chuap hnuaia inkhelah world number 1 Djokovic hian Murray hi 7-6 (7-3) 4-6 6-0 in a hneh a ni. Set khatna chu an inbei tawh hle a, a tawpah Djokovic-a vannei in set khatna a la a, set hnihna-ah Murray rawn ṭang ve lehin set a la let leh thung, set hnuhnung berah erawh Djokovic hian game khat mah hloh loin a chak tlang a ni.

Set thum chauh khelh ni mah se an inbeih tawk em avangin darkar hnih leh minute 46 chhung zet an inkhel a, atawpah tawnhriat leh thahrui ngah zawk a dingchang ta a ni.

World number 1 Djokovic hian Murray hi a ngam hle mai a a, an pahniha an ikhelh tawh 26-ah Murray hi vawi riat chak tawhin Djokovic hi vawi 18 a chak tawh thung a ni. Kuminah Djokovic hi a khel ṭha tluang viau a, match 25 chak tawhin vawi hnih chiah chak loh a nei.

Kum 27-a upa Serbian Djokovic hi tunkar hian World number 1 chawlhkar 141 a ni tling chiah a, Spanish Rafael Nadal-a'n World number 1 a lo nih tawh rei zawng chu a tluk chiah a ni. Inrinnia Kim Sears nena innei mai tur Murray chu World number 4 aṭangin 3-ah a kai sang dawn ta a ni.

Final a chak zo zawk, British number 1 Murray chuan, "Kumin chu ka khel chhe lo khawpin ka hria, ka game khelh danah ka lawm thawkhat viau a ni. Mahse hlawhtling lehzual tur chuan ka thawhrim lehzual a ngai a ni," tiin a sawi.

Djokovic chuan, "Ka tan chuan kum duhthsam a ni rih e, season kan ṭan chauh a nomawi pathum ka chawi der tawh a ni. Hei hian ka hmalam a inkhel ka hmachhawn turah inrintawkna min pek lehzual ka beisei, a bik takin claycourt-ah khelh ṭhat zel ka duh a ni," tiin a sawi.