Champion lai Ramhlun 'S' hmaah Armed Veng 'S'

Zanin dar 7:00 hian Lammualah NECS CUP 2015 semifinal hmasa zawk khelh a ni dawn a, champion lai Ramhlun South hmaah Armed Veng South an ding dawn.

Player nei ṭha Ram­hlun South-in mipui ṭawiawmna an hmu ṭha a, anni au let tur hian Armed Veng South-in an inkhawrh chhuah tam a pawimawh khawp ang.

Armed Veng South-in hmatawngah semifinal-a Khatla lama hattrick siamtu Lalruatpuia an nei a, Ruatpuia thlawp tur hian tlan chak leh ball thiam Lalmuanpuia an kawl bawk. Ramhlun South tlar hnung an chhuanawm bik lo, de­fen­der pawimawh Lal­ramthlamuana an chhawr theih dawn loh bawk avangin Armed Veng South tlar hma tan hun ṭha a inher chhuak thei.

Armed Veng South defender Laldinliana leh R. Lalbiaksanga tana thu lawmawm chu Ramhlun South-in an striker Zico Zoremsanga an hmang thei dawn lo. Chutihrualin Zico tel loh pawh hian Ramhlun South tlar hma hmachhawn hi a châk­awm chuang loh.

Ramhlun South-in MPL3-a player hmuh­nawm Chanmari FC forward Vanlalthlamuana leh Dinthar FC forward Lalawmpuia te an la kawl a, tlar hma chawm turin midfield laiah Dinthar FC rinrawl veteran mid­fielder Samson Rameng­mawia leh Samuel Lal­hruaitluanga te an awm, inkhel hmuhnawm an chhawp chhuak thei ang.

Eng nge an sawi?

Armed Veng South coach Lalramhluna chuan, "Kan khingpui turte hi champion lai an nih avangin kan buai lo a, keimahni chauh kan inngaihtuah zawk a ni. Kan team hi final thleng turin kan ṭha tawk a ni. Ramhlun South lamin an star player ṭhenkhat an chhawr thei lo tur hi a pawi ka ti zawk a, keini lam chuan a ṭha thei ang ber hmachhawn kan duh," tiin inringtawk takin a sawi.

Ramhlun South coach HC Zarzoliana chuan, "Semifinal chinah chuan team chhia kan awm tawh lo, vanneih leh vanduai kar a ni tawh. Mahse keini chu kan inring tawk a, kan khingpui tur hi ka huphurh hran lo. Veng mipuiten min ṭawiawm ṭha a, anni zarah kan chak ngei ka beisei a ni," tiin a sawi.