Chelsea-in £200m dawn an seng

Transfer inhawng mekah Chelsea-in player pasarih lakluh nan pound maktaduai 200 dawn an seng tawh. Season liam ta khan hrem vangin Blues hian nipui transfer-ah player an lalut lo a, hremna hlih a nih hnuah pawh January transfer-ah first team player tur an lalut lo.

Covid-19 buaina karah Club neitu Roman Abramovich-a'n sum a ren lo a, club director Marina Granovskaia a che ṭha bawk. Blues-in an mit it zawng an hlah lo a, manager Frank Lampard-a tan player leh pressure an chhawp sak.

Blues-in Kai Havertz an lak chiah hian pound maktaduai 197 vel an seng chiah a, Brazilian defender Thiago Silva, French defender Malang Sarr leh Dutch defender Xavier Mbuyamba te a thlawnin la lo phei se chuan pound maktaduai 200 chu an hawlh chho der tawh ang.

Chelsea hian Rennes goalkeeper Edouard Mendy lak tumin an dil tawh a, French club hian an dilna hmasa hi an hnawl. Lampard-a'n a keeper neih sa Kepa Arrizabalaga a ring lo tih a chiang a, rinrawl atan kum 38 mi Willy Caballero a duh lo tih a hriat bawk. French club-in pound maktaduai 30 chuang an phut a, Chelsea-in pound maktaduai 200 an hmang pel ngei dawn niin a lang.

Season liam taa Premier League palina Chelsea hi season thara team hmuhnawm ber tur zinga mi an ni tawh a, Lampard-a khelhtir dan tur an inrinsiak nasa hle. Cheslea ṭantute bakah football ngainatute zawhna chu Mason Mount, Tammy Abraham leh Olivier Giroud te tan hmun a awm zel ang em tih hi a ni.