Leeds United-in goal nga an khung

Championship champion Leeds United-in Premier League-ah game mawi an khel a, chet fuh loh chang nei mah se Nilaini zanah erawh rah ṭha a thlen. Marcelo Bielsa hote hian Elland Road-ah Newcastle United 5-2 in an sawp.

Leeds tan Patrick Bamford-a'n first half-a goal a khung hnuah Rodrigo, Stuart Dallas, Ezgjan Alioski leh Jack Harrison ten second half-ah goal khat ṭheuh an khung. Goal luh dan thlirin insawp viau angin lang mah se Newcastle hian Jeff Hendrick hmangin goal an khung hmasa a, Ciaran Clark hmangin an siphurh an sut leh bawk.

Amaherawhchu hun tawp lam minute 13 chhungin Leeds-in goal thum an khung a, chiang takin hnehna an chang. Magpies manager  Steve Bruce chuan, "Kan goal venhim dan kha Pathianni tlaia park vela inkhel ṭhin ang mai kan ni," tiin an tlarhnungte a dem hle.

Leeds boss Marcelo Bielsa chuan, "First half leh second half-ah goal kan nawr na ve ve a, inkhel chawhnu lamah kan hriam zawk. Ka player-te hun tawp thlengin rilru fim takin an khel a, result ṭha tak kan hlawhchhuah theih phah a ni," tiin a sawi.

Leeds leh Newcatle hian point 17 ve ve an hmu a, Steve Bruce-a hote hi match khatin an khel tlem. Bielsa hote hi Pathianni zan dar 10:00-ah an hmelma kum hlun Manchester United nen Old Trafford-ah an inhmachhawn ang.