US Open champion Jannik Sinner

Jannik Sinner chuan mipa tennis world number 1 a nihna chu a takin a lantir. Italian tlangval hian American star Taylor Fritz chu 6-3, 6-4, 7-5 a hnehin a vawi khat nan US Open nomawi a chawi.

Arthur Ashe Stadium-a inkhelah, mipui lamin tualchhung mi Fritz thlawp ṭha viau mah se Sinner a talbuai phah lo, tun season atan Grand Slam pahnih a la - January thla khan Australian Open title a lo la tawh bawk.

Tennis season khat chhungin major tournament pali a awm ṭhin. Sinner-a'n pahnih a la a, a dang pahnih French Open leh Wimbledon title chu Carlos Alcaraz-a'n a la thung, an pahnihin an insem zo tihna a ni.

Grand Slam ni lo mah se Paris Olympic khelh kum a ni a, nomawi lian vawi 24 chawi tawh Novak Djokovic-a'n gold medal a la thung. Serbian star hian Olympic gold medal a ngaihhlut em avangin, player ṭha pahthum hi season an hman danah an lungawi tlang ang.

Buaina karah

US Open khelh hma lawk khan Sinner hian khelmual pawn lamah buaina a nei, damdawi hman phal loh a lo khawih ve nia ngaih a ni a, test pawh a paltlang lo - mahse chhuichian a nih hnuah tihsual a nei lo tih an fiah.

A dinhmun tih chian aṭanga ni 19 a liam leh meuh chuan US Open nomawi a chawi a, point hnuhnung ber a hmuh zawhah van lai hawia ban pharin a dak a, atan chuan title mai bakah hasratna hnehna a nih tel avangin a hlu.

Kum 23 mi Sinner hi Guillermo Vilas (1977) hnuah Grand Slam title lak hmasa ber leh a pahnihna kum khata chhunga ti hlawhtling leh thei hmasa a ni a, Italian tlangval zingah chuan Flushing Meadows-a hlawhtling thei hmasa ber a ni bawk.

Australian Open 2024 title la tur kha chuan Daniil Medvedev lakah set hnih a hloh hnuin ropui takin a tho chhuak a ni a, tun ṭumah chuan darkar hnih leh minute 16 chhungin set hloh loin a inchingfel thei a ni.

Italian tlangval hian a service na leh fuh tak mai chu a hmang thiam em em a, a service hmasa aṭangin 88% ngawt point a hmu, hetih lai hian Fritz erawhin 68% a hmu thung, an danglamna lai ber niin a sawi theih.

Sinner a hriam

A naupan laia vur tawlh nuam ti tak, thingtlanga cheng ve ṭhin Sinner hian set hmasa pahnih la turin harsatna a tawk lem lo, a dinhmun a ṭhat hnuah pawh a nghet chhunzawm a, a pumpuiah a service vawi hnih chiah a hloh.

Set thumna an khelh laiin Fritz rawn khel ṭha deuh mah se, a vawi khat nana Grand Slam final kheltu hian hun pawimawh lai taka point hmuh a harsat deuh tlat a, amah thlawptu mipui hmaah set a sual chhuak zo lo.

Kum 23 mi Sinner chuan, "Tuna ka hlawhtlinna hi thawk leh khata lo thleng thut a ni lo. Australian Open leh US Open nomawi ka chawi theih nan hun rei tak aṭang khan ka lo thawkrim tawh a, tunah chuan ka nghak chhuak ta.

"Champion kan nih chuan kan khel ṭha tihna a ni a, chuvangin tournament ka hmachhawn danah ka lawm. Chutihrualin, hmasawnna tur ka la ngah hle a, chawl loin ka bei chhunzawm zel ang," a ti a, tun season atan a la duhtawk mai lo.

Season kal laiah Sinner hian tournament a khelh hrang hrang zinga parukah final a lut a, hengah te hian a champion zui vek - Italian tlangval tan season duhawm leh chhinchhiah tlak bik a ni a, a hmawr bawkna ATP Finals a beisei zui bawk ang.

Tualchhung tlangval

United States mipui ten tennis an ngaina a, tualchhung tlangval ngeiin US Open nomawi chawi se tih hi an duhthusam a ni ṭhin. New York khawpuiah hian kum 2003 khan Andy Roddick a champion, a hnuah American mipa champion leh thei an la awm lo.

Season 21 a liam ta, tun thlengin Roddick hnung zui leh theitu an la awm lo. Tun ṭum final hi Roddick chuan a hmunah a en, milar hrang hrang zingah tennis star hlui hian lawm a hlawh hle, nomawi chawi thei hnuhnung a nih avangin an ngaihlu.

Fritz chuan, "Hun rei tak chhung chu American tlangval champion hmuh chakin kan nghak tawh a, ka lakah beiseina a awm tih pawh ka hria. Tih hlawhtlin ngei tumin theihtawp pawh ka chhuah, amaherawhchu ka thei ta ngang lo a ni," a ti.

American tlangval, seeded 12-na Fritz chuan sawi zawmin, "Indian Wells 2021 khan straight set hmangin Sinner hi ka lo hneh tawh, kan inkhelh tawhna kha en letin hmasawn ka ngaihna lai ka hmu thei ang," tiin Sinner nen an intawn leh hunah chak a tum thu a sawi.

Taylor Fritz hi kum 26 mi a ni a, 6 ft 5 in a sang niin tennis khel thiam fapa a ni. Naupan lai aṭanga tennia khel ṭhin niin tawnhriat pawh a nei ṭha tawh viau, inelna liana champion tur erawh chuan tun aia a rilru a tih paukhauh lehzual a ngai dawn a ni.