Ronaldo 901 not out

Portugal-in September 9, Pathianni zan khan Lisbon-ah Scotland an mikhual a, Cristiano Ronaldo-a'n inkhel bul ṭan lo mah se hun a tawp meuh chuan player langsar ber a ni. Roberto Martínez hoten match hnihah hnehna an chang ve ve a, Scotland (2-1) an hneh hma hian 2-1 thoin Croatia an hneh tawh bawk.

Lison-a inkhelah Scott McTominay-a'n Scotland hmahruaina goal minute sarihna lekah a khung a, Portugal-in siphurh an sut lawk lo. Minute 54-naah Bruno Fernandez hmangin siphurh an sut a, substitute Ronaldo-a'n minute 88-naah chakna goal a khung.

Euro 2024-ah Ronaldo a khel ṭha tawk lo a, team tichhetu tia sawi pawl pawh an awm. Mahse, Ronaldo-a'n ram tana inkhelh chawlh mai a la tum lo a, Nations League-ah pawh Portugal tan goal pawimawh a khung a, team tan a pawimawh tih a nemnghet.

Scotland lakah hian Martinez-a'n bench-ah Ronaldo hi a dah a, mahni muala khel Portugal hi chak tura ngaih ni mahse rin loh takin McTominay-a'n mikhual team tan goal hmahruai a khung.

First half-ah mualneituin siphurh an sut theih loh avangin halftime-ah 0-1 in an hnufual. Second half ṭan chiahah Ronaldo leh Reuben Neves te an lut a, Portugal an khel ṭha sawt. Bruno Fernandes-a'n box pawn aṭangin minute 54-naah a pet goal a, Scotland keeper Angus Gunn-a'n a tihtur a ti tawk lo.

Ronaldo telna Portugal goal bawh a na zel a, Manchester United leh Real Madrid forward hlui a hmuhnawm - Joao Felix tana ball ṭha a pek leh amah ngeiin goal ban a tauh perte chu goal-ah a lut teuh hle.

Mahse, minute 86-naah Ronaldo-a'n vei lam aṭanga Nuno Mendes-a'n ball vawrhluh ṭha zet chu a tlawh goal. Portugal-in 2-1 in hnehna an chang a, kum 39 mi Ronaldo-a'n hmun pawimawh a chang.

Ronaldo-a'n competitive match-ah goal 901 a khung a, a thlen chin apiang record a ni zel. Portugal number 7 hian inkhelh chawlhsan mai a la tum lo a, Al Nassr-ah hmun pawimawh a chan bawk avangin goal tam zawk khung thei tura ngaih a ni.