HAL SC tan playoff a hnai

I League 3 group C inkhelah HAL SC chuan nimin khan goal an surtir a, Coramandal FC lakah 5-0 ngawta hnehna changin, playoff khelhna chance a sang ta hle.

RG Stadium, Aizawla inkhelah HAL-in goal khung turin hun an mamawh rei lo - second 30-na lekah Santosh V chuan HAL tan an chance neih hmasak ber aṭangin goal hmahruai a khung nghal a, Coramandal an hawihai.

HAL tan Santosh hian minute 24-naah an goal hnihna pawh khung zuiin, captain Tejas S leh Kumayle Merchant-ten first half-ah belhchhahin, 4-0 a ni.

Second half-ah pawh thawnthu a danglam lo - HAL lamin inkhel an thunun chhunzawm a, Andhra Pradesh club Coramandal-in HAL goalkeeper Shubham Tiwari ṭhat leh ṭhat loh an enchhin thei lo. Shreyas Vatekar chuan HAL tan goal khat thawh ve lehin, 5-0 in an chak.

HAL hian match thum an khelh aṭangin point sarih an nei ta a, group C-a a sang pahnihah awm turin an chance a ṭha ta hle - nizan khan match hnih an khelh tawha chak ve ve Chanmari leh match hnih aṭanga point li nei GMSC an inkhel a, an result kan hre hman lo.