Chelsea an buai - a neitu lam an inlungrual lo!

Premier League club Chelsea chu khelmualah chhungah chauh an buai lo - a pawn lamah pawh an talbuai mek a, club thuneitute an inlungrual loh avangin share inelisak a, in um bo an tum mek!

Chelsea chairman, sum hman nuam ti vek tak Todd Boehly chuan club-a share ngah ber ni mek, Clearlake Capital-te share chu leisak vek tumin hma a la mek a, Clearlake Capital lam hian a lo phal bik lo - Boehly-a share hi lei zawh vek an tum ve tho!

July 2022 khan Boehly leh a thawhpuite hian Roman Abramovich hnen aṭangin Blues hi pound tluklehdingawn 2.5-in an lei a, Clearlake hian 61.5% stake an nei mek. A tira inlungrual tak kha tunah an buai mek a, Blues hma hun a chiang ta lo hle.

Thuneihna

London club an lei hnuah Boehly hi thutlukna siamtu leh hma latu langsar a ni a, mahse, January 2023-a Sporting Director hna a chelh lailawkna aṭanga a ban hnuin, Clearlake neitu zinga mi Behdad Eghbali chu thutlukna siamtu ber a ni.

Chelsea-a thuneitu sangte chuan pawl pahnih inkarah inhmuhthiam lohna lian tak a awm mek tih an hria a, a chinfel dan turah an lu a hai hle. Boehly hi amah chauha ṭang a ni lo a, hausa tawntaw Hansjorg Wyss leh Mark Walter te chu a thawhpui tel niin, anni ho hian 38.5% share an nei mek.

Blues hian a tirah chuan club neitu inkara khi awm hi an pha viau a, mahse, media lamin an ngaihven ve reng bawk avangin an pha reng thei ta bik lo - an kal zel dan tur hi hriat a châkawm hle.

An phal lo

Pawl pahnih hian Chelsea an lei dawn khan inremna an nei nual a, chung zingah cuan matching rights leh blocking options a awm - chumi awmzia chu Chelsea lei duhin, pawn lam aṭangin midang lo inrawlh dawn ta se, club-a share nei khan ama thuin share kha a hralh ngawt thei lo.

Boehly hian a share hralh ṭhen lo duh ta se, Clearlake lam rem tihna a lak phawt a ngai a, Clearlake hian an duh chuan rem an lo ti lo thei a, Boehly hian hralh a phal tho a nih chuan, midang a lei tir hmain a share chu an lo leisak daih thei, tihna a ni.

Hetiang teh nuai a nih avang hian club thuneitu sang pawl pahnih an buai hi a awm lo hran lo - midang lakah share hralh tum lo mah se, Chelsea-a thuneihna pumhlum neih an duh ve ve a, an share hralh an phal lo ve ve bawk!

Lu a hai

Chelsea thuneitute hian club chhung buaina hi rei tak chu an thup - a bik takin khelmual lam a nghawng ang tih an hlau ve hle tho a, sporting lama thuneitute chu thil thleng vel hi an hrilh duh lo.

Mahse, Stamford Bridge hi chei ṭhat emaw, hmun danga stadium thar sak chu London club thuneitute hian an tum a, hemi kawnga an hmalakna hi tuna buaina avang hian a muang zo ta vek - a tawpah sporting lam pawhin an hriat a ṭul.

Chelsea neitute hian an inrem ang chuan kum nga danah Chairman thlak zel tur a ni a, tunah hian Boehly chu Chairman a ni mek - inremna awm sa anga a kal a nih chuan kum 2027-ah Boehly hi Chairman a nihna aṭangin a chawl ang.

Khelmual lamah

Boehly leh a thawhpuiten Chelsea an lei hnuah hian player lei nan ringawt pound tluklehdingawn khat chuang an seng tawh a, player an lei nghek nghek avangin sawiselna pawh an tawk nasa hle.

Thawkkhat lai phei chuan Blues hian senior player 42 ngawt an nei hman - mahse, hei erawh 36-ah a tlahniam ve leh tawh a, coach thar Enzo Maresca hoa team thar din tumin, theihtawpin hma an la mek. An beisei ang result erawh an la nei chuang lo.

Blues hian tun season-ah league match thum khel tawhin, vawi khat chiah an la chak a, Wolverhampton Wanderers chu 6-2 a sawpin, Manchester City (2-0) lakah an tlawm a, Crystal Palace chu 1-1 in an inhnehtawkpui bawk.