Mizoram badminton team che ṭha

North East Zone Inter State Badminton Championship 2024 neih mekah Mizoram chuan gold medal an la nghal - Karnataka Indoor Stadium, RG Barua Sports Complex, Guwahati, Assam-a inelnaah hian team event bik chu khelh zawh tawh niin, Mizoramin boy's team event bikah gold medal an la.

Mizoram team hian team event pali zinga pathumah final lutin, pakhatah an champion a, silver medal pahnih an dawng tel bawk - Boy's Team, Girl's Team leh Men's Team event-ah te final an lut vek a, boy's team bikah an champion ta a ni.

North East huapa inelna hi nimin khan open-a inelna chhunzawm a ni a, vawiinah zawh a ni ang - tun hnaia badminton lama hmasawn tak Mizoram hian medal an lak belh nual tura beisei a ni.

Hello Boy's team!

Boy's Team Championship-ah hian Mizoramin first round-ah Meghalaya an hneh a, semifinal-ah Manipur an hneh zui. Final-ah inelna thlengtu Assam hmachhawn zuiin, 2-0 in an hneh a, a vawi khat nan NE Zone Inter-state Badminton Championship-ah gold medal an dawng.

Final-ah hian Mizoram tan H. Lalṭhazuala, Chanmari West chu first singles khel turin a inlan a, a tumpui Alvir Aman, Assam chu deciding game-ah a hneh. Doubles lamah Mizoram tana final khel turin Sainunmawia Sailo, Ramhlun Venglai leh C. Lalramsanga, Durtlang te an lut ve leh a, Assam an hmachhawn - Mawia leh Ramsanga te ṭhiandun hian harsatna lian tham nei loin straight set-in hnehna an chang a, reversed singles khelh a ngaih loh phah - Mizoram badminton chanchina a vawi khat nan, Inter-state badminton championship-ah champion no mawi leh gold medal Mizoram tan an hlawhchhuak a ni.

BAI chuan India ram hi zone ruk, North Zone, NE Zone, South Zone, East Zone, West Zone leh Central Zone-ah te a ṭhen a, zonal tinah hian inelna neih niin, category tina pakhatnate hian national championship-a team event-ah inelna an hmachhawn ṭhin.

Mizoram Junior Boy's team-te hian November-a neih tur, 46th Junior National Badminton Championship-a Team event-ah North East ai an awh ang - inelna hi Bhubaneswar, Odisha-in a thleng ang.

Silver medal chu

Mizoramin final-a thlenna category dang pahnihah gold medal a hlawhchhuak zo lo a, silver medal-ah lungawi an zir - Girl's Team Championship-ah first round-ah Tripura an hneh hnuin semifinal-ah Manipur an paltlang a, final-ah erawh Assam an hneh zo ta lo. Mizoram tan first singles-ah Lalrinkimi inlanin, doubles-ah Lalrempuii leh Zoramthari Renthlei te an inlan thung.

He championship a inelna ngaihhlut hlawh ber tihngam, Men's Team Championship-ah Mizoramin silver medal-ah lungawi an zir - first round-ah Nagaland chu harsatna awm loin an hneh a, semifinal-ah inelna thlengtu Assam chu reversed doubles-ah straight set a hnehin, 3-2 in an chak a, NE zone inelnaa men's team inelnaa Assam an hneh hmasak ber a ni hial.

Mizoram hian final inkhel hmuhnawm takah Arunachal Pradesh an hmachhawn a, 3-2 in an vanduai. First singles-ah Mizoram tan Saitluangpuia Sailo chu inlanin, a tumpui Nikhil Chetry chu deciding-ah a hneh phawt. Second singles-ah H. Lalṭhazuala inlan ve lehin, hliam vanga a inhnuhdawh a ṭul a, 1-1 a ni.

First doubles-a chhunzawm niin, Mizoram tan C. Lalramzauva leh Joseph VL Ringngheta te an lut a, an tumpui Nikhil Chetry leh Samuel Tamang-te straight set-in an hneh, 2-1 a nih chhunzawm. Reversed singles-ah C. Lalramsanga leh Samuel Tamang-te an intum leh a, Arunachal Pradesh lam chungnung zawkin, chak zawkah an ṭang a, 2-2 a ni. Reversed doubles khelh a ngai a, Sainunmawia Sailo leh C. Lalramsanga te ṭangdun chu Laa Talar leh Laa Tukum-te ṭangdun lakah deciding game-ah vanduaiin, 3-2 in Arunachal Pradesh in hnehna an chang a, an champion zui ta a ni.

Sulhnu ropui

TATA Trusts, NEIDA, MSSC leh Mizoram Badminton Association-te thawhhona avângin badminton-in Mizoramah hnuhma thar a hnutchhiah chho zel a, hmasawnna hmuh tur a tam ta hle.

Men's team-in Assam an hneh hnuin, Junior team lamin Gold medal hial an vaw chhuak thei ta - record hmuh mai theih chinah a vawikhat nan Junior Girl's team lamin final an lut bawk.

Mizoram Badminton Association chuan thuchhuah siamin, an hlawhtlinna avanga an lawm thu an sawi a, player leh official thawk chhuakte an chhuan thu an sawi.

MBA chuan TATA Trusts, NEIDA leh Mizoram State Sports Council bakah anmahni sponsor-tu zawng zawngte chungah lawmthu an sawi bawk.