Spain-in hnehna an chang ve ta

European champion an nih hnua an match hmasa berah Serbia nen an inhnehtawk hnuin, Spain-in hnehna an chang ve ta a, UEFA Nations League-a an match hnihnaah Pathianni zan khan Switzerland chu 4-1 in an sawp.

Switzerland khelmuala inkhelah Spain hian inkhel an thunun a, minute lina lekah Joselu chuan goal hmahruai a khung - kum 34 mi striker hian Real Madrid tan khel tawh loin, Qatar Stars League club Al Gharafa pan mah se, coach Luis de la Fuente-a'n ram tan a koh loh phah lo.

Swiss team tan Becir Omeragic chuan si phurh a sutah inngai mah se, video assistant referee hmanga ennawn a nih hnuah a goal hmaa handball vangin pawmsak an ni lo a, 1-0 a nih chhunzawm.

Spain an ngawi rei lo - minute 13-naah Fabian Ruiz chuan a khung belh ve leh a, 2-0 a ni. La Roja hi an chak ang em, tih ai chuan, "Eng zat tak khung ang maw?" tih chu zawhna a ni a, mahse, minute 20-naah Atletico Madrid defender Robin le Normand chu Breel Embolo laka a foul avangin hnawhchhuah a ni a, inkhel boruak hei hian a thlak danglam zui.

Le Normand hnawhchhuahna aṭanga an freekick hmuh chu Zeki Amdouni chuan crossbar tihper nan a hmang a, minute 41-naah si phurh a sut ṭhen zui. European champion dinhmun a derthawng a, an hmai a uang lo.

Mahse, second half-ah Spain vanneihna a her chhuak zui - minute 45 zet shot nei loa an awm hnuah, Ferran Torres-a cross aṭanga ball kal chu Ruiz bawkin goal-ah a chantir zui a, minute 80-naah Torres hian a belhchhah bawk.

Goal dang lut loin hun a tawp zui a, 4-1 in Spain an chak - La Roja hian Nations League A group 4-ah pahnihna dinhmun an luah mek a, point li an nei ta. Hmahruaitu hi Denmark niin, Pathianni zan inkhel dangah 2-0 in Serbia an hneh.

Denmark tan Albert Gronbaek leh Yussuf Poulsen ten goal khat ve ve an khung a, mikhual khelmuala inlan Serbia-in a chhanletna tur an nei lo.