Depay-a'n rin loh lam a pan dawn

Club nei loa rei tak a awm hnuah Memphis Depay chuan Europe a chhuahsan dawn niin khawthlang media-te chuan an tarlang a, mahse, Netherlands striker hian player dang angin sum tamna middle east emaw US lam emaw a pan dawn lo - Corinthians nen sawi zawm a ni.

Depay hian season hmasa kha Atletico Madrid-ah a khel a, June thla khan a contract hmang zoin, Madrid khaw club hian chelh an tum loh avangin a chhuak - club nei loin a awm reng a, hemi a nih avang hian international break-ah pawh coach Ronald Koeman chuan a ko lo.

AS Roma, Sevilla leh Rayo Vallecano te nen pawh Depay hi sawi zawm hman a ni a, mahse, Dutch striker hian rin loh takin Brazilian club hi a pan dawn - Netherlands-ah medical a nei fel diam tawh niin an sawi.

Khawthlang media ṭhenkhat tarlan dan chuan, kum 30 mi Manchester United forward hlui hian Corinthians-ah hian kum 2026 thleng khel turin contract a ziak dawn a, Brazil-ah hming chher a tum ang.

PSV Eindhoven aṭanga inzir chhuak Depay hian Manchester United-ah beisei a phak loh hnuin French club Lyon-ah hming a chher a, hemi hnu hian Barcelona leh Atletico Madrid lamah a kal leh a, mahse, Spanish football-ah beisei a phak lo zui.

Atletico Madrid tan hian season khat leh a chanve khel hmanin, match 40-ah goal 13 chiah a khungsak.