A zawnin Marquez a chak
Marc Marquez chuan Pathianni zana tlan zawh tak San Marino Grand Prix-ah hnehna a chang a, bike intlansiakna sang berah hian tun hnaiah a zawnin hnehna a chang - a theihna sang tak kha a la bo lo tih kan hmu leh ta.
World champion vawi ruk ni tawh Marquez hian kar hmasa khan Aragon, Spain-ah hnehna a chang tawh bawk, kum thum hnua a chak lehna hmasa ber niin tunah chuan a zawnin a chak leh ta hial a ni.
Misano tlankawngah hian rider championship lama hmahruaitu Jorge Martin a che ṭha tawk lo, Spanish rider hi 15-naah a thlen phak chauh avangin a hmahruaina pawh a zim ta, pahnihna Francesco Bagnaia nen an inkarah point sarih chauh a awm.
Marquez erawhin Martin hi a la hlat deuh, a phak lohna chu point 53 a la ni. Amaherawhchu, intlansiak vawi khatah pakhatna in point 25 ngawt an hmu thei a, hei vang hian season tawp lama champion tum inum boruak a sang dawn hle tih a chiang.
Pakuana aṭanga tlan ṭan, a tawpa hnehna changtu Marquez chuan, "Ruah a tla a, chumi hnua chak tak maia ka tlan thei kha a lawmawm. Hma ka hruai chinah kha chuan inthlahdah miah loa awm ka tum a, a tawp ka thleng chiah kha chu sawi ngaihna awm lo khawpa lawmawm a ni," a ti.
Intlansiak laiin ruah tlemte a sur a, rider leh team ten hetiang hunah hian thutlukna an siam dik a ngai ṭhin. Marquez hian tlankawng huh leh ro a hmachhawn tam tawh a, tawnhriat a neih ṭhat leh a huaisenna chu a tawpah a chhawr.
Lap tlan hmabak 20 a la awm laiin Martin hian a bike ke a thlak, tlankawng huha hman tut bike ke a thlak - khawchin thlirna aṭangin ruah hi tam zawk sur thei tur angin a lang, mahse champion tuma inum zingah amah chiah hian bike ke a thlak.
Inrinni khan Sprint Race lamah hnehna changin a boruak ṭha viau mah se, intlansiak takah erawh a tawpa point khat a hmuh hram avangin a lawm ang. Thutlukna an siam fuh tawk loh chu a tawpah a tuar ta a ni.
Bike intlansiakna sang ber MotoGP hi September 22, Pathianni hian an tlan chhunzawm leh dawn. Kazakhstan rama an tlan theih loh aia siam belh Emilia Romagna Grand Prix an tlan leh ang.