Croatia chakna Modric

Nations League-ah Croatia-in an match hmasa berah Portugal hneh lo mah se Pathianni zan khan Poland an hneh a, goal awmchhun hi minute 52-naa Luka Modric khung a ni.

Real Madrid midfielder Modric hian box pawn chiah aṭangin mawi zetin a pet lut a, kum 39 a tlin hma hretin goal pawimawh a khung.

Modric hian September 9, Thawhṭanni khan kum 39 a tling a, Croatia captain hian ram tan match 180 khel tawhin European player zingah amah aia khel tam chu Cristiano Ronaldo (213) chiah a awm.

Croatia captain Modric chuan, "Ka chawlh hun tur ka la sawi thei lo a, ka hmalam hun hi ka ngaihtuah lo. Keimahah phurna a awm tawh lo a nih chuan ka chawl ang. Keimah chauhin phurna ka neih leh neih loh ka hria a, thutlukna siamtu tur pawh keimah ka ni," tiin chawlh a la tum loh thu a sawi.