I League Second Division Hmahruaitu thar Aizawl FC

8th April, 2015

Aizawl FC chak nan Liberian forward Alfred Kemah Jaryan goal hnih a tawk lo a, injury time-a Lalbiakthanga goal hmangin Aizawl FC-in nimin khan Hindustan 3-2 in an hneh hram.

Aizawl FC hian vawi li an khelh tawhah an la chak vek a, Chanmari FC-in an khingpui Lonestar Kashmir an hneh loh bawk avangin Aizawl FC chu I League Second Division hmahruaitu thar an ni. Aizawl FC hian Phase 1-ah PIFA, United SC leh Chanmari FC te an la hmachhawn ang.

Aizawl FC Starting Eleven

Goalkeeper : Zothanmawia; Defenders: Lalramchullova, Emmanuel Chigozie, Lalṭhakima; Imanuel HS Lalthazuala; Midfielder: David Lalrinmuana (C); H. Lalbiakthanga, Albert Zohmingmawia, Brandon Vanlalremdika; Strikers: William Lalnunfela, Alfred Kemah Jaryan

Inkhel chu

Nimina Kanchenjunga Stadium-a inkhelhah Aizawl FC leh Hindustan FC te first half-ah an inhnehtawk a, MPL3 champion hi inkhelah an chungnung hret a, goal hmuh tur erawh a awm lo.

Second half-ah contract vanga Mohammedan SC hmachhawn thei lo Liberian forward Alfred-a'n ṭan aṭanga minute thumna lekah vei lam aṭanga Lalramchullova ball vawrh luh ṭha tak chu goal-ah a chan tir a. Aizawl FC foreign striker hian Brandon VL Remdika thawhrah sengin minute 62-naah goal hnihna a khung leh bawk.

Goal hnih luh hnuah Aizawl FC an fimkhur tawk lo a, Jagdeep Singh hmangin Hindustan-in minute 62-naah goal khatna an khung a. Hun tawp lamah Aizawl FC talbuai zuiin minute 88-naah Nigerian forward O.O. Sola hmangin an siphurh an sut.

Aizawl FC an zam lo a, minute khat hnuah Albert Zohmingmawia'n ṭha taka a lak luh hnuah cool takin BT-a'n chakna goal a khung. Aizawl FC goal pawimawh hi Kawnpui tlangval pahnih thawhrah a ni.

Coach a lawm

Aizawl coach K. Malsawmkima chuan, "Kan khelh apiangin point thum hmuh kan tum a, kan hmu zel si a, a lawmawm hle mai, Pathian malsawmna a ni," a ti.

Inkhel chungchang sawi zuiin Mala chuan, "First half kan khel fuh lo leh tawh a, second half-ah erawh chak kan phu a, chance pawh kan nei ṭha zawk. Kan fimkhur loh vangin point hloh theih dinhmunah kan ding hman hial. Kan inkhel aṭanga lang chiang deuh chu kan khelh tur hi a la harsa chho zel dawn tih hi a ni," tiin hmabak a la harsat thu a sawi.