Kolkata club an chak

I League second division Round 3-ah Kolkata club Mohammedan SC leh United SC te Mizoram club Aizawl FC leh Chanmari FC lakah an tlawm. Niminah erawh Mohammedan SC leh United SC hi an chak chiang hle.

SSB Ranidanga-ah Moham­medan SC-in an khingpui PIFA 5-0 ngawtin an sawp. First half-ah Nigerian forward Oluwaunmi Somide Adelaja chiahin goal a khung a; second half-ah Adelaja-a'n goal hnihna a khung leh a, Ashim Biswas-a'n goal hnih a khung bakah Bijendra Rai-a'n goal khat a khung ve bawk.

Kanchenchunga Stadium-a inkhelah goal riat ngawt a lut a, United SC-in Eric Brown-a hattrick hmangin Kenkre 5-3 in an hneh.

ONGC tan pawha khel ṭhin Brown hian second 12-na lekah United SC goal hmahruai a khung. Liberian forward hian hun chanve hma lam leh hnung lamah goal khat ve ve khung belh lehin hattrick a siam a. Azaharuddin Malik leh Kenkre player Tabia-a'n an lama a tih luh hmangin United SC-in goal nga an khung tling. Kenkre point hlawhchhuah nan Bernard-a goal hnih leh Yash Mhapre te goal a tawk lo.

Mumbai club PIFA FC hi match li khelh tawhah point khat chiah an hmuh avangin I League khelhna chance an nei meuhtawh lo a, point la hmu lo Kenkre dinhmun a chhe lehzual.

Mohammedan SC leh United SC erawhin point ruk an hmu tawh a, I League khelh beiseina an nei chhunzawm zel.