IPL season 8 ṭan a ni dawn ta

Cricket ngainatu te nghahhlelh Indian Premier League season riat na chu zanin hian khelh ṭan a ni dawn ta a, Eden Gardens, Kolkata-ah Kolkata Knight Riders leh Mumbai Indians te'n match hmasa ber an khel ang. Indian Premier League-ah hian match 60 awmin ni 47 chhunga khelh zawh tura tih a ni.

Nizan khan opening ceremony chu Salt Lake Stadium-ah neih ni tawhin Bollywood star lar tak tak Hrithik Roshan, Shahid Kapoor, Farhan Akhtar leh Anushka Sharma te an inlan a, Saif Ali Khan chu 'host'-ah hman a ni.

Kolkata vs Mumbai

Kolkata Knight Riders hi India rama Bollywood star lawm hlawh ber pawl Shah Rukh Khan-a team niin Kolkata khawpuia innghat an ni. Team captain hi Indian cricketer tawnhriat nei ṭha ber pawl Gautam Gambhir a ni a, Kum 33-a upa batsman hi mamawh huna che ṭha ṭhin a ni. Ball hlap nuam ti Robin Uthappa an nei bawk.

KKR tan bowling lamah Sunil Narine hi an innghahna tur a ni dawn. West Indies spin bowler hian 2014 IPL-ah match 16 khelin wicket 16 a la thei a, ani hmachhawn hi batsman te'n an chak lo ang. India fast bowler World Cup khelh zawh taka wicket 18 latu Umesh Yadav hi a inrintawk lai tak a nih dawn avangin KKR tan chuan thlamuanpui tham a ni ang. KKR coach hi Sri Lanka coach hlui Trevor Bayliss a ni.

Mumbai Indians hi captain Rohit Sharma chuan a rawn ho dawn a, Cricket ODI match khata run siam hnem ber record chelhtu hi a khelh ṭhat ni chuan dan ngaihna awm lo khawpa run hlapchhuak hnem thei a ni. A ni thlawp tur hian Australia World champion team a tel Aaron Finch-a awm bawk a, kum 28-a upa batsman hi Australia player pawimawh ni pha a nih vangin a chhe thei lo.

Bowling lamah India spinner neih ṭhat ber pawl Harbhajan Singh leh Sri Lanka innghahna ni ṭhin Lasith Malinga te an neih avangin batsman tan hmachhawn an chakawm loh ang. Mumbai Indians hi Australia cricketer ropui leh captain chawl ta Ricky Ponting enkawlna hnuaiah an khel ang.