Sum tamna IPL

India ram infiamnaah cricket aia sum tamna a awm lo. Cricket in ngainatu leh entu a ngah vang a ni. Kumin IPL-ah pawh ṭum dang ang tho in sum a tam leh dawn a, players hlawh hnem tak tak an tam hle.

India batsman lar ber pawl Yuvraj Singh chuan India pawisa in maktaduai 160 a hlawh dawn a, Delhi Daredevils tan a khel ang. India captain Mahendra Singh Dhoni hlawh tur pawh hi dinchhuah pui tham a ni. Ni 47 chhung lekin Chennai Super Kings-ah maktaduai 130 a hlawh dawn. Bollywood actress lar Anushka Sharma bialpa Virat Kohli pawh hi pocket money-ah a buai lo ang, Royal Challengers Bangalore captain hian makatduai 125 zet a hlawh dawn tlat. RCB player zingah Dinesh Karthik chuan maktaduai 105 a hlawh dawn bawk. Mumbai Indians captain Rohit Sharma pawh maktaduai 125 ngawtin a hausak belh anga, KKR captain Gautam Gambhir pawn maktaduai 122.5 a hlawh bawk ang.

Indian player zingah maktaduai 95 hlawh tur Sunrisers Hyderabad player Shikhar Dhawan leh CSK player Suresh Raina te, Rajasthan Royals lama maktaduai 75 hlawh tur Ajinkya Rahane te hlawh pawh hi ṭhahnem tham tak a ni.

India player ni lo, ram dang player IPL rawn khel tur zingah pawh hlawh hnem tak tak an tam dawn a, West Indies star Royal Challengers Bangalore-a maktaduai 95 hlawh tur Chris Gayle te, a team mate maktaduai 75 hlawh tur South Africa captain AB De Villiers bakah Kings XI Punjab lama maktaduai 125 hlawh tur David Miller te hi hlawh hnem pawl an ni ang.