FA Cup Liverpool tan zaninah fiahna

Zanin dar 12:15-ah Liver­pool in FA Cup quar­ter-final replay an khel dawn a, Championship club Blackburn Rovers khelmualah an lenglut ang. Team pahnih hi thla hmasa khan Anfield-ah inkhel tawhin, goal awm lo in an ṭin. Inkhel hi Star Sports 2-ah live in pekchhuah a ni ang.

Ewood Park-a inkhel tura chak zawk zawk hian April 19-ah FA Cup semi-final an khel anga, Premier League club Aston Villa an hmachhawn ang.

Che ṭha lo pahnih

Team pahnih hi an intawn hmasak zawka khel ṭha tluang tak nichungin an intawng a, goal in pe lo in an ṭin. Tunhnaiah erawh team pahnih an che chhia a, a bik takin Liverpool an che chhe lehzual a, zanin hi insiamṭhatna remchangah hman an tum ngei ang.

Blackburn Rovers hi tunhnaiah Cham­pionship lamah an che chhia a, season thara Premier League inhlankai an tumna chu tunhnai an result avangin a thamral ṭan mek. An match hnuhnung pangaah vawi thum chakin vawi hnih an chak lo a, an khelh hnuhnung berah erawh league lama vawihnih an chak loh zawn hnuin Leeds United chu khualmualah 3-0 in an sawp a, zaninah an khelh ṭhatna hi chhawm nun zel an tum ang.

Liverpool hian season bul chhe taka an ṭan hnuin kuminah an rawn che ṭha chho a, an khel a hmuhnawm thei hle. Mahse, tunhnaiah Champions League khelh an inchuhpui zinga team lian pahnih Manchester United leh Arsenal a zawnin an hneh lo a, an hnual lai tak a ni. Liverpool hi an match hnuhnung pangaah vawi hnih chiah chakin vawi khat an khingpui an draw a, vawi hnih lai an chak lo thung. Arsenal laka 1-4 lai a tlawm hlim Liverpool tawn hi Blackburn tan chak remchan hun lai tak a ni maithei a, chak lo hlim thinrim an tawng fuh palh thei bawk.

Team pahnih hi tunhnai vawi nga an inkhelhah Liverpool an chungnung zawk a, Reds hian vawi hnih hnehna changin vawi khat Rovers hi an chak ve thung a, vawi khat erawh chak zawk awm lo in an ṭin a ni.

Inhliam ngah Blackburn

Blackburn in an players pawimawh inhliam vangin chhawr theih loh an nei nual dawn a; Rudy Gestede, Chris Brown, Simon Eastwood leh Chris Taylor te chu an khelh theih dawn leh dawn loh a la chiang lo. Craig Conway, Grant Hanley, Josh King leh David Dunn te chu khel thei lo tur chiang sa an nih hmel a, Liverpool player hlui Jay Spearing chu Liverpool tan FA Cup-a alo inlan tawh vangin Liverpool a hma­chhawn thei lo bawk ang.

Liverpool tan captain Steven Gerrard, Martin Skrtel leh Emre Can te chu hrem vangin an khel thei dawn lo vek a, Mario Balotelli chu khup hliam vangin a khelh theih dawn leh dawn loh a la chiang lo thung.

Eng nge an sawi?

Blackburn Rovers manager Gary Bowyer chuan, "Kan quarter-final kalkawngah Premier League club Swansea City leh Stoke City kan hneh a, Premier League club hneh tur erawh chuan khelh ṭhat mai bakah vanneihna hi a ngai tel ve a ni. Kan khelh ṭhat vanga quarter-final replay khel tur kan ni a, Anfield ang khan ṭha taka khelh kan beisei a ni," a ti.

Liverpool manager Brendan Rodgers chuan, "Players thawkrim tak tak leh an theihna zawng zawng pe ṭhin te ka kawl a, ka vannei hle a ni. Ka player te'n FA Cup-a champion an chak a ni. Blackburn tum hi a hautak dawn tih kan hria a, mahse final luh a champion kan duh a ni," tiin champion ngei an tum thu a sawi.