Naughton a hliam na

Hull City nen an inkhelh ṭumin Swansea City full-back Kyle Naughton chuan a ke rekah hliam a tuar a, a hliam hi endik a nih hnuah tun season chhung a inkhel thei tawh dawn lo tih Swansea in an puang.

Inrinni khan Liberty Stadium-ah Swansea hian Hull City hi 3-1 in an hneh a, he inkhelah hian Hull midfielder David Meyler chuan Naughton hi a tlawh hliam a ni. Meyler hi hnawhchhuah zui nghal a ni bawk.

Naughton thlak tur hian manager Garry Monk chuan Angel Rangel a chhawr ngeiin a rinawm a, Spanish footballer Rangel chuan, "Kyle inhliam hi pawi ka ti a, kan club tan chuan chanchin lawmawm loh tak a ni. Mahse kan boss in inkhel tur a min ko a nih chuan ka theih tawp ka chhuah ang," tiin a sawi.