UCL-ah kan champion leh thei - Franck Ribery

Bayern Munich forward Franck Ribery chuan an club chu player inhliam vangin buai deuh mah se UEFA Champions League-ah an champion leh theih a rin thu a sawi.

Kuminah Ribery hi a kerek hliam avangin a inkhel tam thei lo a, Inrinnia Dortmund an hneh ṭum pawh khan a inkhel ve thei lo a, midfielder Bastian Schwein­steiger pawh inhliam vangin second-half-ah lakchhuah a ni a. Defender pawimawh David Alaba pawh hun rei tak an chhawr thei tawh lo.

Karleh hian Porto nen Champions League quarterfinal first leg an khel leh tawh dawn a, kum hnih liamtaa Wembley-a an champion tawhna kha kuminah Berlin-ah an chhunzawm leh theih a ring hle a ni.

French forward Ri­bery chuan, "Champions League nomawi hi kan chawi leh thei a ni. Cham­pions League hi chu a danglam bik a, Bundesliga nen chuan khai khin theih pawh a ni lo ang. Tunah hian inhliam vangin kan pla­yer pawimawh ṭhenkhat chhawr thei lo mah ila player ṭha tak tak dang an la awm tam avangin beiseina kan nei a ni," tiin a sawi.

Kum 32-a upa Ribery chuan sawi chhunzawmin, "Champions League-ah champion nawmna tem tawh chuan a hlut zia leh danglam bik zia a hre tawh. Inkhelh ka chawlhsan hma ngei hian he nomawi hi chawi leh ka châk takzet a, chawi leh thei turin kan team hi kan ṭha tawk bawk a ni," tiin Champions League champion hlut zia a hriat chian thu a sawi.