Vargas-a season a tawp
Queens Park Rangers striker Eduardo Vargas chu a khup hliam vangin tun season chhung chu a inkhel thei dawn lo.
Inrinni a QPR in 4-1 a West Brom an hneh ṭum khan Vargas hian goal a khung nghe nghe a, mahse inkhel tawp hmain a khupah hliam a tawrh avangin thlak a ngai. A hliam hi endik a nih hnuah chawlhkar 10 aṭanga 12 vel a chawlh a ngaih tur thu tihchian a ni. Vargas hi tun season chhung chu QPR tan a inlan thei tawh lo ang.
QPR hi tun dinhmunah Premier League-ah 19 na an ni mek a, match sarih chauh khelh tur a awm tawh avangin season thara Premier League khel chhunzawm tur chuan chetsual a thiang tawh lo.
Dinhmun khirhkhan taka an din lai a an forward inhliam hi club tan chuan chanchin lawmawm loh tak a ni ngei ang.Vargas bakah hian defender Richard Dunne leh midfielder Leroy Fer te chu hliam avangin an khel thei lo mek bawk a, mahse anni pahnih hi chuan training an zawm thei ṭep tawh a ni.
Kum 25-a upa forward hian Napoli aṭangin QPR hi loan in a zawm a, a club tan hian match 21 khel tawhin goal li a khung tawh. An ran Chile tan match 39 khel tawhin goal 18 lai a khung tawh bawk a ni.