Man City boss Pellegrini a hlauthawng lo
Thawhṭanni zana Manchester City-in Crystal Palace an hneh loh avangin champion lai hi pahnihna aṭangin palinaah an tla thla a, Premier League-ah hmahruaitu Chelsea champion turin an dinhmun a ṭha hle.
City manager Manuel Pellegrini chuan inkhelh banah a dinhmun a derthawn loh thu sawi.
Pellegrini chuan, "Chelsea emaw champion chungchang emaw kan ngaihtuah lo. Kan duh chu kan khelh hmabak apiang chak a ni. Match sarih kan khelh hmabakah hian point tam thei ang ber kan hmu ang a; chumi zawh chuan pakhatna, pahnihna, pathumna leh palina chu a hriat ang," a ti.
Kum 2012 leh 2014 champion Manchester City hi kum 2011 hnua a vawi khatna atan league-ah a zawnin vawi thum khualmualah an chak lo.
Kum 61-a upa Pellegrini chuan, "Ka hna chungchangah hlauhthawnna ka nei lo. Ka hna ṭha takin ka thawk a, ka hlim a, hlauhthawn tur a awm lo. Kan team-in season harsa tak kan paltlang chho mek a, chutichung chuan kan hna chungchang chu ngaihtuah suh u," tiin ban a inrin loh thu a sawi.
Pellegrini hma chiaha manager Roberto Mancini kha kum 2013 khan nomawi a chawi loh hnuah ban a ni.
Thlirna dang aṭangin
Tottenham manager hlui David Pleat chuan City tranfer kalphung leh youth team tana first team luh harsa lutuk chu a sawisel.
Tun season-ah City hian forward Wilfried Bony, defender Eliaquim Mangala, midfielder Fernando leh goalkeeper Willy Caballero lak luh nan pound maktaduai 80 an hmang.
Pleat chuan, "Pellegrini hian a hna ngai a chelh reng emaw a chhuak emaw pawh nise club neitu Sheikh Mansour chu a lawm lo tawp ang. Financial fair play aṭanga chhut chuan pawisa hman an thiam lo a, player upa tak tak an kawl khawm a, naupang ṭha zawk chher chhuak angin insawi mah se an thusawi ang hian a awm lo a ni," tiin a sawi.
Spurs boss hlui chuan City-in point an hloh leh avangin Chelsea chu an champion tawha a ngaih thu a sawi bawk.
Aguero a ṭawl
City striker Sergio Aguero-a'n tun season-ah goal 17 khung tawhin Diego Costa leh Harry Kane goal hnih chiahin a pha lo. Amaherawhchu January 10 hnuah City-in match 14 an khel tawh a, vawi sarih an chak lo. Argentine forward hian minute 556 goal a khung tawh lo.
City hian September 15, 2014 hnuah a vawi khatna atan top 3 an chhuah san. Kum 2015-ah point 18 chiah an la hmu a, anni aiin an hmelma Manchester United point riatin an hmu tam zawk. Tunah hian match 31-ah point 61 an hmu mek a, season liamta kha chuan tun ang hunah hian point 70 an hmu tawh. Tin, match 31-ah goal 63 an khung a, nikuma goal 84 an khung nen chuan inthlau tak a ni.