Mercedes beng harh tu Sebastian Vettel

Malaysian Grand Prix 2015-ah khan Mercedes hian tluk loh pakhat an nei a chu chu Ferrari driver Sebastian Vettel a ni.

Nikum aṭang tawh khan Mercedes team hian Formula one inelna hi an thunun hle a, kumin intlansiak hmasa ber Australian Grand Prix-ah pawh Lewis Hamilton chu pakhatna a ni, mahse intlansiak hnuhnung berah erawh Ferrari hnungah an awm.

He an chak lohna hian a tih harh zawk thu Mercedes boss Toto Wolff chuan a sawiin, "Inelna thianghlim leh fair taka chak lo zawk nih hi chu a tha nat thlak loh, kan tan chuan chona thar min pe tu leh hmasawn duhna thinlung min puttir tu a ni zawk a ni," tiin a sawi.

Sawi chunzawmin Wolff chuan, "Malaysia-ah khan Ferrari khan chak zawk nih an phu a a ni. Formula one inelna hi a hautak avangin chak ber a nih reng theih loh tih chu kan hre vek awm e, intlansiak kan hmachhawn leh tur Chinese Grand Prix-ah chuan a tlan chak ber nih ngei kan tum leh ang," tiin a sawi.

Tunkar tawp China-a intlansiak lo awm tur atan hian Mercedes hi an inpuahchah nasa leh tawh hle a, technical director Paddy Lowe chuan, "Kan team hi kan ṭha tawk viau a, mahse hmasawn na tur kan la nei. Khawvela inelna hautak ber te zinga mi a nih avangin nitin hmasawn reng a ngai a ni, hma kan sawn loh chuan team dangin min tlansan mai ṭhin. Malaysia aia ṭha zawk khan kan tlan theih ngei ka beisei," tiin a sawi bawk.