NECS Cup Semifinal Armed Veng vs BVT
NECS CUP 2015 semi final hnuhnung zawk chu zanin dar 8:00 hian Lammualah Armed Veng leh Bethlehem Vengthlang ten an khel ang. Football thiam veng pahnih te inkhel tur hi mipui hmuh chak a ni.
Mipui tam zan
Armed veng hian fans an nei ngah leh ngeiin a rinawm, semi final-ah pawh an ṭhutna tura ruat a lenglo khawp an kal khawm thei a, zaninah pawh an tam leh hle tura ngaih a ni. Bethlehem Vengthlang lam pawh hi an chakna hnar ber pakhat chu an fan-te an nih avangin zanin pawh hian fans an pawimawh leh dawn a, an veng mipui ṭhahnem takin ṭawiawm an tum.
Inkhel turte
Tualchhung football a tawn hriat ngah leh hnuhma nei ṭha Armed Veng hian forward Lalfakzuala leh Lalbiakhlua an nei a, anni pahnih hi final thlenpui tham khawp a thiam leh fing an ni. Anni bakah hian player naupang zawk ho khawm turin tlarhnungah captain MP-a an nei bawk a, team ṭha leh hlauhawm tak chu an ni.
Bethlehem Vengthlang lam hmachhuan tur chu an captain Lalrammawia a ni leh ngei ang, ani hi semi final a goal hnih khung thei kha a ni a, innghahna tham a ni. Tlarhnung lamah Zohmangaiha leh Lalmuanawma te hi an ding khawng leh hle ang. Bethlehem Vengthlang hian head coach atan Sangzuala Hmar an la a, ani hnuaiah hian thla thum zet training an neih tawh avangin inrintawkna an nei sang hle.
Eng nge an sawi?
Armed Veng coach Lalramchhuana chuan, "Final kan thlen ka beisei. Kan theihtawpin kan khel dawn a, chak turin kan fight dawn a ni. Bethlehem Vengthlang hi kan huphurh hran lo," tiin a sawi.
Bethlehem Vengthlang coach Lalrinfela chuan, "Kan inbuatsaihna a ṭhat vanga tun hun hi thleng thei kan ni a, semi final a tawp mai hi kan tum lo. Player te an fit ṭhat avangin kan zam lo a, kan chak ngei ka ring," tiin Vanglaini palai a hrilh.
BVT FC secretary Lalruatfela chuan, "Tuikual South khawtlang hruaitute leh team enkawltute chungah kan lawm takzet a, anni zarah ṭha takin semifinal kan khel thei ang," tiin a sawi.
BVT-in quarterfinal-ah Tuikual South 4-0 in an hneh a, khawchhiat vanga an khel zo thei lo nachungin Tuikual South hian rematch emaw khelh zawh kher emaw phut loin BVT hi an chak tir a ni.