Champion lai Manchester City an zawr
Selhurst Park-ah Manchester City-in mualneitu Crystal Palace 2-1 in an hneh lo a, champion nawn a harsa ṭalh tawh ang.
Manchester City hi league-ah a zawnin khualmualah vawi thum an chak lohna chiah a ni a, Thawhṭanni zana Palace an hneh loh hma hian Liverpool leh Burnley an hneh lo tawh. Match hnuhnung pangaa point 12 hlu tak an hloh avangin hmahruaitu Chelsea point kua ngawtin an pha tawh lo a, Jose Mourinho hote hi vawi khatin an khel tlem zawk bawk.
City hnehtu Palace erawh Alan Pardew kaihhruaina hnuaiah an kâng chho dawrh dawrh a, a zawna vawi thum an chak avangin 11-naah an awm tawh. Pardew enkawl tirh hian Palace hi relegation zone-ah an awm a, Newcastle boss hlui hnuaia match 11 an khelhah Pardew-a'n point 22 a hmu a, chu chu tuna table mawngphaha awm mek Leicester City point hmuh zat nen a inzat.
City daltu Palace
Pathianni khan City elpui Arsenal leh Manchester United te an chak avangin Manuel Pellegrini hote hi palinaah an awm a, pahnihna dinhmun hauh turin chak an mamawh.
Inkhel an ṭan chauh a, Wilfried Zaha-a'n Palace tan a khung teuh nghal hle. Hemi hnu hian City-in an thunun a, David Silva goal khung tur chu Palace keeper Julian Speroni-a'n ṭum hnih zet a dan sak a; Argentine forward Sergio Aguero-a'n goal ban a pet per bawk.
Minute 34-naah Palace-in City an barakhaih a, Joe Ledley ball tauh pial chu Scott Dann-a'n goal-ah petin keeper Joe Hart-a'n dang mah se a per chu Glenn Murray-a'n a khung chiang hle. Kum 31-a upa Murray hian match hnuhnung pangaah goal nga a khung tawh.
Selhurst Park-a City buaina belhchhah turin second half ṭan aṭanga minute thumna lekah Jason Puncheon-a'n freekick aṭangin nalh zetin a khung a, 2-0 a ni.
Pellegrini-a'n inhliam vangin Wilfried Bony a hruai tel lo a, tlar hmaah chhawr tur a ngah tawk lo. Fernandinho ball pet per chuan goal khungtu Murray-a kut per mah se City penalty pek an ni lo a, Brazilian midfielder goal khung tur chu goalline aṭangin James McArthur-a'n a pet chhuah sak bawk.
Minute 12 chauh a awm tawh tihin City midfielder Yaya Toure-a'n yard 12 aṭangin kawh zetin a khung a, Ivorian midfielder goal hnihna khung tur erawh keeper Speroni-a'n a dang hram. Palace an ṭang tluan a, 2-1 in champion lai an hneh.
City hian Pathianni khian Manchester United hmachhawn turin Old Trafford an tlawh dawn a, match hnuhnung 12-ah City hi an hmelma United aiin point riatin an hmu tlem zawk.
Top 10-a awm tum
Crystal Palace manager Alan Pardew chuan, "A zawnin vawi thum kan chak a. City bakah QPR leh Stoke laka hnehna kan chante kha a awlsam lo a ni. Tun dinhmuna kan khelh dan thlir chuan ram pumah che ṭha pali zingah kan tel a, season tawpa a sang 10-a awm hi kan tur a ni," tiin a sawi.
Team Dinhmun
# Team Pld GD Pts
1 Chelsea 30 37 70
2 Arsenal 31 30 63
3 Man Utd 31 27 62
4 Man City 31 33 61
5 Liverpool 31 9 54
6 Tottenham 31 5 54