I League Second Division Goal 16 khung tawh Chanmari FC an tlawm

Nimin khan Siliguri-ah vawi thum chak zawn tawh Chanmari FC-in hartharna chang Kashmir Lonestar FC 2-1 in an hneh lo.

Tun dinhmuna I League Second Division-a goal khung tam ber Chanmari FC-in first half-ah Lal­biakhlua hmangin hma hruai mah se second half-a Ajay Singh leh Christopher Chizoba te goal hmangin Kashmir Lonestar-in hnehna an chang. Kashmir club hian match hmasa bera Aizawl FC laka an tlawm hnuah a zawnin vawi thum an chak tawh.

Chanmari goal diffe­rence a la ṭha lawr lak a, amaherawhchu head to head en zawk tur a nih avangin Lonestar hi pa­hnihnaah an awm a, Chan­mari hi pakhatna aṭangin pathumnaah an tla thla.

Chanmari FC hian Phase 1-ah Mohammedan SC, PIFA leh Aizawl FC te an la hmachhawn bawk ang.

MPL2 champion Chan­mari hian inhliam vangin keeper Lalawmpuia leh defender Lalruatthara te an chhawr thei lo a, chutichung chuan chak tura rinkai zawk a ni.

SSB Ranidanga Ground-a inkhelah hian first half-ah Mizoram Police aṭanga an hawh Biaktea'n minute 26-naah a khung a, Keifang forward hian goal ruk khung tawhin tun inelnaah a la khung tam ber.

Second half-ah Lonestar goal hmaah an vannei zawk a, minute 70-naah Ajay Singh hmangin an siphurh an sut. Hun tawp hma minute hnih la awmin goal hmahruai siamsaktu Mohun Bagan player hlui Christopher-a'n penalty aṭangin chakna goal a khung.

Chanmari FC coach H. Vanlalthlanga chuan, "Referee nen an ṭang a, min hneh hram a ni. Sawi tur vak ka nei lo. Goal hmasa zawk kha offside vang a ni a, penalty an hmuh hma khan Achi-a inhliam chu field chhungah luh an phal lawk lo bawk. Thuneitute hian duhsak bik an nei a, chutichung chuan theihtawp kan chhuah zel dawn," tiin a lungawi lo hle.