Liverpool-in champion zia an chhuah leh ta

Premier League champion rin hlawh ber thlang dawn ila, Liverpool-in rin an hlawh berin a rinawm - rin an hlawh ang ngeiin Reds-in champion zia an chhuah leh ta a, an elpui Tottenham Hotspur chu 2-1 in an hneh. 

Liverpool tan Mohamed Salah-a'n goal hmahruai a khung hnuah Son Heung-Min chuan Spurs tan si phurh a sut a, team pahnih an inhnehtawk dawna a lan mai hnuah Lammuala inkhel tawh Roberto Firmino-a'n minute 90-naah chakna goal a khung. 

Jurgen Klopp-a nauten hnehna an chan tak avangin table chung ber an luah ta a, an hnuai chiahah Spurs an awm ve ta thung - league match 13 chauh la khel mah se Liverpool fan-ten champion an mitthla leh ṭan der tawh ang. 

Anfield-a inkhelh zawhah Jose Mourinho leh Klopp an inbia a, German coach chuan, "Jose khan team ṭha zawk an tlawm thu min hrilh a, a uangah ka ngai. Mahse, a lo uang miah si lo," tiin a sawi a, hei hian inkhel boruak sanzia a hrilhfiah. 

Anfield-ah rin lawk ang ngeiin Reds-in inkhel an thunun a, goal khung tuma an nawr laiin Spurs erawh an bet thlap a, an thiamna ber counter-attack chhawr ṭangkai tumin an khel. 

Minute 26-naah Liverpool-in goal an khung ta nge nge a, Mohamed Salah-a shot chuan Eric Dier perin Spurs keeper Hugo Lloris man rual lohin goal-ah a lut. 

Anfield-a fans 2,000-te au thawm pawh a reh fel hman lo. Liverpool goal lama hun la hmang mang lo Spurs-in goal an chhuah aṭanga minute sarihna lekah Son hmangin hun ṭha an nei zui a, South Korean forward tla fal tak hian si phurh sut turin harsatna a nei lo - offisde leh offside loh VAR hmanga ennawn a ni a, goal-ah pawm a ni. 

Son-a'n tun season Premier League-ah goal 11-a khung tling ta der a, match 13 lek aṭanga a goal khung hmangin season hmasa tluana league-a a goal khung zat goal 11 a nihrual ta der!

Tun season-a Liverpool player sawisel hlawh ber thlang dawn ila, Roberto Firmino a ni hial mai thei - Brazilian striker-in goal a khung tam tawk lo a, goal piah lama team tana a hnathawh hmuh hmaihtuten statistic hmangin Bobby ṭhat tawk lohna an sawi ṭhin. 

Mahse, statistic hmanga hrilhfiah theih loh player an awm a, chutiang chu Roberto Firmino hi a ni. Brazilian striker hian Jurgen Klopp-a rin a hlawh reng a, amah sawiseltute ngei pawh inkhel pawimawhah goal hmangin a chhang ta. 

Premier League table chunga awm team pahnih hi 1-1 in an ṭin mai dawn niin a lang tawh a, mahse a hunah tak Firmino kan hmu. Minute 90-naah Andy Robertson corner aṭanga ball kal chu a tauh lut a, 2-1 in Liverpool an chak. 

Kum 29 mi striker-in tun season league match 13-a goal thum a khungna chauh a ni a, assist vawi hnih a nei tawh bawk - Liverpool an champion a nih chuan Spurs laka a goal pawimawh hi hriat reng a ni ang. 

Mourinho-a'n inkhelh zawhah chak phu zawk an nih thu a sawi a, Portuguese manager ṭawng duhzia hre ṭhang tan chuan fiamthu ang mai a ni a, inkhel pumpui thlirtuten Jose ngaihdan an ṭawm lo bawk ang. 

Minute 90 chhungin Liverpool-in 76% ball an chang thei a, vawi 17 ngawt shot an neih zinga 11 chu target-a kal a ni - Spurs hian vawi riat chiah shot an nei a, heng zinga pahnih chiah hi target zawnah an pet thei thung. 

Mahse, Mourinho thlirna tarmit aṭanga thlir chuan Portuguese coach hi dem theih lutuk a ni lo - Harry Kane-a'n hnai set sawt aṭangin holam takin a tauh goal lo a,  Steven Bergwijn chuan post a tih per bawk. 

Chutihrual chuan Liverpool hian goal hnih an khung piahlamah chance an nei nual tih hriat a ṭha - Salah, Curtis Jones leh Firmino-ten goal khung belhna remchang an nei vek a, point thum hmuh phu zawkin hnehna an chang. 

Liverpool tlachhe mek dinthar a, English club pangngai taka din lehtu Gerard Houllier chu Thawhṭanni zan khan lung lam fel lo avangin a thi a, Liverpool tana 2000-01 season-a cup treble chawitu hi English club-in an hre reng. 

Inkhel ṭan hmain French manager hriatreng nan player leh fan-ten kut an beng a, Covid-19 vanga fans tam lo tak pung khawm chuan Houllier puala an hla sak ṭhin sa chungin an zai rual dual dual bawk. 

Hliam vanga talbuai Liverpool player-te pawhin Houllier thlah zanah football hmuhnawm an pho chhuak a, Spurs an hmachhawn hmaa Fulham inhnehtawkpuitu team nen chuan an dang tawh. 

Mual sir lamah a dan pangngaiin Klopp-a hmuhnawm a, German coach-in chak a duhzia a lantir - Mourinho chuan inkhelh zawhah Klopp hi a kap zui. 

Counter attacking football thiam chungchuang laka kan khelh dan kha chhuan-awm tak a ni a, kan ball chan zat kha en ula, ti ṭha tak kan ni. Tottenham laka inven dan ṭha ber chu ball chan hnem zawk a ni. 

Goal an khung a, chance pawh vawi hnih an nei - mahse, khami tih lohah kha chuan inkhel kan thunun tluan a, kan phu ang ngeiin point thum kan hlawh chhuak. Ka hlim takzet. 

Spurs goal kha ka ngaihdanah chuan offside a ni a, vawi 20 vel an ennawn a, keiin ka en ve chuan a offside a ni. Bobby ball tauh kha a ṭha takzet a, ka lawmpui em em a ni. A khel ṭha a, a che vel a hmuhnawm a, midang tan hmun awl a siamsak char char a ni. 

Hnehna chan tumin kan inkhel a, point khata lungawi kan tum reng reng a lo. Point insem ta ila, result fair tak a ni mai thei. Mahse, hnehna chan tuma inkhel kan ni a, chance pawh kan nei a ni. Kan hun neih leh Liverpool lam chet dan vel kha en ula, an hlauthawng takzet a nih kha. 

Tlawm hi kan phu lo a, mahse, hei hi football chu a ni miau si. Ka naute khelh danah ka lawm a ni. Counter-attack chhawr kan duh avangin player kan thlak a, kan ti ngei bawk. Gio (Lo Celso) pawh kha yellow card a hmu tawh si a, mual sira lehlam (Liverpool coaching staff) chet dan enin an hnawhchhuah mai ka hlau a, ka la chhuak a ni. 

Klopp-a chet dan ang khan lo che ve ta ila, kei chu min hnawtchhuak daih ang. A chet dan kha a phur leh nuam tih vangah in ngai em ni? Nge midang (Pep Guardiola) anga fourth official kut aṭanga screen la sawn turin min beisei?