Zaninah MSL Zarkawt derby Zarkawt BCA Vs Zarkawt Serpents
Zanin dar 8:00 hian Hall a Indoor Stadium-ah Zarkawt veng basketball club pahnih Zarkawt BCA leh Zarkawt Serpents te an inkhel ang. Zanin hian Zarkawt veng mipui an inṭhen phawk dawna, a zatvein Zarkawt BCA an ṭan anga, a chanve dangin Zarkawt Serpents an ṭan thung ang.
Team pahnih te hi kumin February 27 khan an lo inkhel tawh a, Zarkawt Serpents lamin inkhel bul ṭan ṭha mah se a tawpah an ṭang tluan zo lo a, Zarkawt BCA in 75-70 in hnehna an chang hram. Zanin hian Zarkawt Serpents lam hlain an hneh loh tawh lakah hian tlawm nawn an duh lo ang. Zarkawt BCA lam pawhin final luh an duh takzet a nih chuan point hloh an tum lo bawk ang. Match thum ve ve chauh khelh tur an nei tawh a ni.
Zarkawt BCA lam hian an player pawimawh Albert Lalramchhuana chu inhliam vangin an la chhawr thei dawn lo a, hetih lai hian an khingpui tur Zarkawt Serpents lam erawh an damkim a, inkhel thei lo tur an awm lo.
Zarkawr BCA hian match sarih khelh tawh aṭangin point 12 an hmuin table-ah pahnihna an ni mek a, hmahruaitu Khatla TBL nen an inthlauhna chu point hnih chauh a ni. An khingpui tur Zarkawt Serpents hian match sarih khelh tawh aṭangin point kua an hmu tawhin table-ah pangana an ni mek thung. An inthlauhna hi point thum chauh ala nih avangin zanin hian chak an tum ruh ve ve hle ang.
Eng nge an sawi?
Zarkawt BCA Assistant Coach Lalruatfel a chuan, "Kar hnih chhung inbuatsaihna hun ṭha kan neihah khan theih tawpin ṭan kan la a, a hma aiin kan ṭha leh zual tawh ang. Kan khingpui tur hi ka huphurh hran lo a, khawtlang mipui te ṭawiawm ṭha ṭhin em em a, anni puihna zarah kan chak theih ngei pawh ka beisei," tiin a sawi.
Zarkawt Serpents coach Dino Lalruatpuia Chhangte chuan, "Kan player te an damkim a, kan fit ṭhat bawk avangin kan chak ka beisei. Kan inkhelh hmasak khan kan vanduai a, hneh turin kan ṭha tawk a ni tih chu kan hmu tawh. Chuvangin kan hun a inherchhuah ve tawh ka beisei. Khawtlang mipuiin min tawiawm ṭha ṭhin a kan lawm em em, anni zarah tun hun hi kan thleng thei a ni." tiin Vanglaini palai a hrilh.