Dan rual loh Ramhlun South

NECS CUP 2015 semi final hmasa zawk inkhelah champion lai Ramhlun South chuan champion nawn an tum a ni tih lantirin team ṭha leh hlauhawm Armed Veng South 5-1 in an sawp a, a kum zawnin final an lut ta.

Armed Veng South hian quarter final-ah Khatla 4-0 a an sawp theih avangin Ramhlun South khel tur hian inrintawkna an nei sangin an phur hle a, Semi final-ah pawh inkhel bul an ṭan chhe hran lo. Forward tlan chak leh ball thiam Lalrammuanpuia hmangin inkhel ṭan aṭanga minute 10 lekah goal an khung nghal.

Armed Veng South in an goal khung an lawm, mahse an lawm au ri pawh a reh hmain Ramhlun South lamin midfielder Samson Ramengmawia hmangin an si phurh an sut ve nghal. Hemi hnu hian Ramhlun South hi an hawi let tawh lo,an forward Lalnunmawia goal thun hmangin minute 43-naah an hmahruaina goal an khung zui bawk.

Second half-ah pawh Ramhlun South bawk an chungnung, striker Zico Zoremsanga chhawr thei lo mah se Lalawmpuia an nei a, ani hian minute 53-ah an goal thumna a khung. Armed Veng South lamin an si phurh sut tumin nawr mah se Ramhlun South tlarhnung an sutlang thei lo. Hun tawp hma minute 10 chauh awm tawhah first half a goal khungtu Nunmawia'n an goal lina a khung a, minute 88-ah Awmpuia chuan an goal nga na leh he inkhel a goal hnuhnung ber a khung bawk.

Eng nge an sawi?

Ramhlun South coach HC Zarzoliana chuan, "Kan vannei a ni. Game boruak sangah chuan player senior leh tawnhriat ngah tawh an ṭangkai ṭhin a, kan player senior te kan ṭhat pui a ni. kan goal thun te kha kan en chuan kan vanneih goal a ni hlawm a, final kan thleng thei hi kan lawm tak zet a ni," tiin a sawi.

Armed Veng South coach Lalramhluna chuan, "Kan vanduai a ni. Champion tumin theih tawp kan chhuah a, sum leh pai tha leh zung sengin kan inbuatsaih nasa hle. Kan tum ram kan thleng zo ta lo hi pawi ka ti a ni. Kan veng mipui leh Local Council te min phurpuina leh ṭawiawmnaah lawmthu ka sawi," a ti.

Refree thutlukna ah a lungawi loh thu sawi chhunzawmin, "Refree khan handball tur ngei a ham loh avnagin goal kan chhuah, kha khan kan game a ti chhe vek a ni. Tun hnuah chuan khatiang thil duhawm lo kha thleng nawn tawh lo se ka duh hle. Champion nomawi ka chawi pui loh vangin veng mipuite ngaihdamna ka dil e," tiin Vanglaini palai a hrilh.