Turkish Super Lig tihtawp lailawk a ni

Turkish Football Federation (TFF), Thawhṭannia ṭhukhawm chuan Fenerbahce team bus-in silai hmanga beih a tawhna chu thlir letin kar khat chhung atan Turkish Super Lig chu tihtawp an rel.

TFF chairman Yildirim Demiroren chuan, "Kha in beihna kha firfiak pawlte thiltih ngei niin kan ngai a, Fenerbahce beihna mai ni loin Turkish Sports beihna a ni. League leh cup game zawng zawng chu kar khat chhung atan tihtawp rih mai kan rel ta a ni," a ti.

Turkish Super Lig champion lai Fenerbahce hian kar hmasa Inrinni khan 5-1 in Rizespor chu an hneh a, Trabzon airport pana an team bus haw lam chu silai hmanga kah a ni. Players inhliam awm lo mah se driver erawh hospital-ah hruai a ni a, Turkey sports minister Akif Cagatay Kilic chuan bus driver Ufuk Kiran chu a ṭha chak hle niin a sawi.