Man Utd vs Man City Hmelma hmachhawn hun tak a ni - Kompany

Manchester City captain Vincent Kom­pany chuan tun hnaiah che ṭha lo mah se an hmelma Manchester United an hmachhawn hun chu a fuh thu a sawi. City hi match hnuhnung pangaah vawi thum an chak lo a, Pathiannia an khingpui tur United erawh a zawnin vawi nga an chak thung

Belgian defender Kompany chuan, "Derby khelh hun tak a ni. Tun hi kan theihna lanchhuah tir hun remchang a ni. Eng dihmunah pawh ding ila, derby chu derby a ni a, inkhel dang daih a ni," tiin derby chu inkhel danglam bik a nih thu a sawi.

Man City hian Crystal Palace an hneh loh avangin Premier League champion lai hi pahnihna aṭangin palinaah an tla thla a, hmahruaitu Chelsea nena an inkarah point kua lai a awm.

City captain Kompany chuan sawi chhun­zawmin, "Tuna kan duh ber chu kan theihna anga khelh chhuah theih a ni. Insiamṭhat kan mamawh tih a chiang a, chutihrualin season liamta aṭanga chhutin ṭha takin season hi kan zo ang a, season tharah pawh kan ṭha chhunzawm zel ang," tiin a ringtawk hle.

Manchester City goal­keeper hlui Joe Corrigan chu a club hlui player-te khelh danah a lungawi lo. Corrigan chuan, "Manager chuan player-te field chhunga an tih tur a hrilh thei a, hna thawktu tak tak chu player-te an ni. City player-te hian an theihna tak takin an khel lo a, chak tumna a nei lo ni," tiin an result chhiat chhanah player-te a dem hle.