Mayweather-a mouthguard man a to dawn

May 2-ah boxing khaw­vela chanchin ngah ber pa­hnih Floyd May­wea­ther leh Manny Pacquiao te an inhnek dawn a, he inhnek ropui tak tur avang hian boxer pahnih te'n chanchinthar danglam tak tak an nei deuh reng.

American boxer May­weather pawn chanchin danglam tak a nei leh tawh a, chu chu Pacquiao nen an inhnek dawna a 'mouthguard' man tur chungchang hi a ni.

Mayweather-a 'mouthguard' man tur hi a to dawn khawp a, beisei dan chuan $25,000 (Rs 15,56,748) man tura ngaih a ni a, rangkachak leh lunghlu hmanga cheibawl tur a ni.

Kum 38-a upa May­weather chuan a 'mouth­guard' tur chung­chang hi sawiin, "Kum 19 chhung boxing ka lo khel ve tawh a, mawi taka nuih hi ka phu vein ka hria," a ti.

Sum leh pai ngah chapo pui ve tak May­weather hi Pacquiao nen an inhnek hunah hian pound maktaduai 122 hlawhchhuak thei tura beisei a ni.

Boxer ho hian an inhnek dawna an thawm­hnaw man velah hian an inseng hnem ṭhin hrim hrim a, British boxer Amir Khan chuan nikum December thlaa Devon Alexander-a inhnek pui ṭum khan kekawrbul rangkachak hmanga chei, £20,000 (Rs 12,45,399) leh £30,000 (Rs 18,68,098) inkar man chu a lo ha tawh bawk.

Amir Khan hian a kekawrbul manto hi Taliban helpawlin an beih mi 141 thihna Peshawar army school building siam ṭhat nan a hlan a ni.