Tuikual South-in phuba an la

Samsung 3:16 Plan Soltuion Mizoram Super League a ngaihnawm zel a, Thawhlehni zan khan Tuikual South BC chuan an inkhelh hmasak zawka an hneh loh tawh Mission Veng Vikings lakah phuba an la a, 64-62 in hnehna an chang.

Hawla Indoor Stadium-a inkhelah hian Tuikual South tan an captain tawnhriat nei ṭha F.Zodinthar-a'n a naute tan entawn tur hnutchhiahin points 19 zet a score a, rebounds pakua a la bawk.

Mission Veng Vikings-in an player pawimawh Lalrina Renthlei an chhawr thei lo a, Tuikual South pawhin Haryana tlangval pasang Rakesh chu Eastern Railway a zawm tawh vangin an chhawr thei lo bawk.

Game khelh ṭan tirh aṭangin team pahnih an in hlau lo tawn a, hma an inhruai chhawk zak zak. 1st quarter tawp lamah score zat in angin half time-ah Tuikual South in points 2-in hma an hruai a, 3rd quarter-ah Vikings lamin hma an hruai ve thung. 4th quarter-ah Mission Veng lamin hma hruai reng mah se hun tawp dawn hnaih lamah an player-te tawnhriat neih ngah tawk loh Mission veng-in an tuar a, Tuikual South-in lehthal tir lehin a chak lo zawkah an ṭang ta a ni.

Eng nge an sawi?

Tuikual South coach K.C. Lalliantluanga chuan, "Chak zawkah ṭang mah ila kan khel ṭha lo a, kan beisei angin kan khel chhuak zo lo. Mahse, kan vannei a, a tawpah kan chak ta hram a ni," tiin chak mah se beisei anga an khelh chhuah loh thu a sawi bakah player pawimawh Rakesh-a awm loh vanga an buai loh thu a sawi bawk.

KC-a chuan an chak loh lai pawha ṭawiawm tlat ṭhintu Tuikual khawtlang mipui te chungah lawmthu a sawi a, ṭawiawm chhunzawm zel turin a sawm bawk.

Mission Veng Vikings manager Reuben Lal­chhandama chuan, "Kan chak loh chhan chu keini aia an khelh ṭhat zawk vang a ni mai. Kan player pawimawh Lalrina Renthlei awm lo kan tawrh rualin a tel lo pawha chak thei tur kan ni a, kan tawnhriat neih ṭhat loh kan tuar a ni ber. A tir kan ṭan ṭha chungin a tawp boruak sang kan zo lo a, kan tawlh thlu ta a ni," a ti.

Chanmari tlangval Reuben-a chuan champion chungchang sawilangin, "Champion thei lo tawp tur chu kan ni lo a, final luhna chance kan la nei a ni. A pawimawh ber chu chak chhoh zel a ni a, chumi ti thei tur chuan min ṭantute ṭawiawmna kan mamawh takzet a ni," tiin an fan-te chu an chakna hnar ber an nih thu a sawi.

Team Dinhmun

# TEAM Pld W L Pts G.Avg

1 Khatla TBL 7 7 0 14 1.2

2 Zarkawt BCA 7 5 2 12 1.07

3 Mission Veng Vikings 7 3 4 10 0.97

4 Tuikual South BC 7 3 4 10 1

5 Zarkawt Serpents 7 2 5 9 0.93

6 Chaltlang Ryders 7 1 6 8 0.86